Detaje të reja kanë dalë në dritë për arrestimin e dy të rinjve pak pas mesditës në Vlorë.
Arben Zajmi dhe një 18-vjeçar u vunë në pranga nga policia, pas një ndjekje që zgjati rreth 20 minuta, pasi dyshja vodhën një automjet tip “Golf”.
Dy të rinjtë e kanë marrë mjetin në një pikë lavazhi, pranë Plazhit të Vjetër në Vlorë, ku kanë pretenduar se i ka dërguar pronari.
Në momentin që është kthyer për të marrë mjetin e tij dhe nuk e ka gjetur pranë lavazhit, pronari i “Golf-it” ka njoftuar policinë.
Efektivët e “Rrugores” dhe të forcave “Shqiponja” i janë vënë pas grabitësve duke i pikasur në lëvizje drejt autostradës Vlorë-Levan.
Teksa tentuan të shmangnin forcat e rendit në një dalje dytësore, të rinjve iu bë pritë nga efektivë të armatosur, duke bërë që ata të ndalojnë makinën.
