Skënderbeu është i kompletuar tashmë dhe me shumë mundësi në masën 95% ky do të jetë ekipi që do të përfaqësojë bardhekuqtë në sezonin e ri të Superiores.
dhe pse një pjesë e boshtit janë lojtarë që kanë qenë te korçarët sezonin e shkuar në Kategorinë e Parë, bardhekuqtë kanë afruar elementë të tjerë për të kompletuar ekipin.
Pikërisht këtu qëndron problemi që mund të jetë shqetësues për Ivan Gvozdenoviçin dhe stafin e tij. Në momentet që flasim, duke marrë parasysh edhe Randi Dumfurin që pritet të bashkohet me ekipin, korçarët numërojnë plot gjashtë lojtarë të huaj që tejkalojnë numrin e lejuar të aktivizimeve nga FSHF-ja.
Në kushte të tilla trajneri Ivan Gvozdenoviç pritet që të përcaktojë se cilët do të jenë lojtarët stabël të Skënderbeut në sezonin e ri, dhe sa prej tyre do të shihen si mundësi alternative për të mos krijuar probleme sa i përket formacionit.
Duket se diçka të tillë bardhekuqtë, duke parë edhe dublimin në çdo pozicion të futbollistëve, mund ta zgjidhin fare thjeshtë. I vetmi problem mbetet çështja e rreshtimit, pasi në rast se korçarët përdorin skemën 3-5-2, trajneri Gvozdenoviç duhet të heqë dorë nga një mes sulmuesve Fleçer ose Diabi ose mbrojtësi Randi Dumfur.
Natyrisht që një pjesë e rëndësishme e sezonit që shkoi është edhe Gresild Lika te Skënderbeu. Lojtari që erdhi nga Partizani në Korçë dhe bëri mirë sezonin e kaluar duket se po nxeh motorët për të treguar vlerat e tij edhe në Superiore. Edhe pse reparti ku ai luan është i mbingarkuar me shumë elementë dhe i dubluar në thuajse çdo pozicion, Lika sërish vijon të jetë gati për të bërë gjithçka duhet për një fanellë titullari.
Në një prononcim të dhënë për “Panorama Sport”, sulmuesi tregon se kjo konkurrencë në këtë repart rrit mjaft përgjegjshmërinë e lojtarëve dhe mbi të gjitha i mban të karikuar për të dhënë maksimumin në çdo seancë stërvitore.
“Skënderbeu është i kompletuar dhe mezi presim të nisim sezonin e ri. Do të jetë i vështirë, po, këtë e dimë, por ne do të jemi atje për të përballur çdo kundërshtar me kokën lart. Jemi një grup i ri dhe me elementë cilësorë, ndaj duhet të tregojmë veten tonë. Konkurrenca këtë sezon është rritur shumë. Prandaj edhe për këtë duhet që të tregojmë në çdo seancë stërvitore se e meritojmë një vend titullari. Pritet një sezon i vështirë, jo vetëm në kampionat, por edhe për një fanellë titullari. Ndaj, për mendimin tim kjo i bën mirë grupit. Jemi para një beteje, unë jam gati për ta fituar dhe të përmbushim objektivat”, theksoi sulmuesi bardhekuq.
