Egnatia ka humbur me rezultatin 2-4 miqësoren e luksit përballë Interit, sfidë e luajtur në stadiumin e qytetit të Ferraras në Itali, teksa paraqitja e rrogozhinasve ishte për t’u duartrokitur.
Egnatia kaloi dy herë në avantazh përballë zikaltërve, ku trajneri Simone Inzaghi kishte hedhur në fushën e blertë më të mirë, pavarësisht nivelit të kundërshtarit.
Rrogozhinasit kaluan që në minutën e ‘6 në avantazh me sulmuesin kryesor të tyre Raphael Dwamena. Ishte një aksion fantastik i rrogozhinasve, ku pas një pasimi nga e djathta, Dwamena ishte i vetëm përballë portierit Sommer, duke e çuar topin në rrjetë. Me avantazhin e ekipit shqiptar u mbyll dhe fraksioni i parë i lojës.
Në minutën e ’55 Interi barazoi rezultatin. Një top i gjatë i Bastonit gjen të vendosur gabim mbrojtjen e Egnatias, me Barelën i cili kontrolloi topin në të djathtën dhe pas gjuajtjes, mposhti Alen Sherrin.
Por, në minutën e ’67 Egnatia fitoi një penallti, pasi pas një gjuajtje të Albano Aleksit ishte Lautaro Martinez i cili bllokoi topin me dorë brenda zonës. 11-metërshi u shndërrua në gol me “panenka” nga Fernando duke kaluar rrogozhinasit sërish në avantazh.
Interi barazoi rezultatin në minutën e ’80 të takimit me Lautaro Martinez, i cili e çoi topin me kokë në portë, pas një harkimi nga Lazaro. Tre minuta më vonë, gjyqtari “i dhuroi” një penallti Interit, pas një stimulimi të dukshëm të Lautaro Martinezit, teksa ky i fundit nuk gaboi nga pika e bardhë duke i kaluar zikaltërit në avantazh. Për shkak të ndërrimeve të shumta, pati një “shthurje” tek Egnatia, e cila pësoi dhe një gol tjetër në minutën e ’90 me Joaquin Correan.
Gjithsesi, ekipi i Egnatias bëri një paraqitje dinjitoze përball një ekipi si Interi, i cili si një nga pretendentët për fitimin e kampionatit në Itali. Një prej heronjëve të kësaj mbrëmjes për rrogozhinasit ishte portieri Alen Sherri, i cili pavarësisht pësimit të 4 golave, bëri shumë pritje spektakolare
