Një i ri nga Maqellara ka përfunduar në prangat e policisë, pas kërkesës së drejtësisë spanjolle për ekstradimin e tij.
Geraldo Skënderi është arrestuar nga autoritetet vendase, pasi rezulton se Gjykata e Castellon në Spanjë i ka caktuar masë sigurie “arrest në burg” për shkak të pjesëmarrjes në një grup kriminal të përfshirën në kultivimin e kanabisit.
Njoftimi i policisë:
Njësia FAST Albania në Drejtorinë e Përgjithshme të Policisë së Shtetit, në bashkëpunim të ngushtë me strukturat operacionale në DVP Tiranë, në kuadër të operacionit policor të koduar “Castellon 2”, bënë të mundur kapjen dhe arrestimin provizor me qëllim ekstradimin drejt Spanjës të shtetasit G.S. :
25 vjeç, banues në Maqellarë, Dibër.
Arrestimi provizor i këtij shtetasi u bë pasi Gjykata e Castellon Spanjë, i ka caktuar masën e sigurisë “Arrest në burg”, për veprat penale “Trafik droge”, “Organizatë kriminale” dhe “Vjedhje e energjisë elektrike”, të parashikuar nga Kodi Penal i Spanjës.
Ky shtetas në bashkëpunim me shtetas të tjerë shqiptarë e spanjollë, merrnin shtëpi me qera në zonën e Castellonit dhe i përshtatnin për të kultivuar bimë narkotike me anë të llambave.
Interpol Tirana vijon procedurat ligjore për ekstradimin e tij drejt Spanjës.
