Polonia po planifikon të dërgojë deri në 10,000 trupa shtesë në kufirin e saj me Bjellorusinë.
Planin e ka bërë të ditur ministri polak i mbrojtjes, duke sqaruar se ushtarët do të vendosen për të mbështetur Rojet Kufitare në një përpjekje për të “trembur” sulmuesit e mundshëm.
“Rreth 10,000 ushtarë do të jenë në kufi, nga të cilët 4,000 do të mbështesin drejtpërdrejt Rojet Kufitare dhe 6,000 do të jenë në rezervë. Ne do e zhvendosim ushtrinë më afër kufirit me Bjellorusinë për të trembur agresorin që të mos guxojë të na sulmojë”, tha Mariusz Blaszczak në një intervistë për radion publike.
Ndërkohë, ditën e djeshme zëvendësministri i Brendshëm i Polonisë, Maciej Wasik tha se 2,000 trupa do të stacionohen në kufi.
Zyrtarët polakë janë gjithnjë e më shumë të shqetësuar për zonën e saj kufitare që kur qindra luftëtarë mercenarë rusë të Wagner mbërritën në Bjellorusi muajin e kaluar.
Shumë prej tyre ndoqën liderin e tyre Yevegny Prigozhin në vend pasi ai u internua atje kur dështoi rebelimi i armatosur kundër Vladimir Putin.
Që atëherë, Alexander Lukashenko, presidenti i Bjellorusisë, ka deklaruar disa herë se po i frenonte luftëtarët që të sulmonin Poloninë, duke thënë se duhet “falënderuar” ai që i ndaloi ata të “shpartallonin” qytete si Varshava.
Megjithatë, analistët perëndimorë kanë thënë se Polonia nuk ka nevojë të shqetësohet për një sulm të mundshëm, duke vendosur në dyshim edhe kapacitetin ushtarak të Bjellorusisë.
