Ekipi i Egnatias do të zhvillojë një miqësore luksi me ekipin e famshëm italian, Inter. Është ekipi i Interit që ka njoftuar miliona fansa në rrjetet sociale për miqësoren me ekipin e Rrogozhinës.
Ndeshja do të zhvillohet në 13 gusht në stadiumin “Paolo Mazza” (20:00) në Ferrara, Itali. Ky stadium është edhe një prej 5 impianteve sportive më të vjetër në Itali.
“Mbajeni shënim datën 13 gusht. Skuadra po përgatitet për dy testet e fundit përpara debutimit në kampionat kundër Monzës (19 gusht, 20:45) në ‘San Siro’.
Interi do të zbresë në fushë më 9 gusht përballë Salzburgut në Austri (19:00). Dhe të dielën e 13 gushtit (20:00) në stadiumin ‘Paolo Mazza’ të Ferrarës kundër KS Egnatias, klubit nga Rrogozhina që luan në ligën kryesore të Shqipërisë”, thuhet në njoftimin e ekipit të Interit.
Një tjetër miqësore luksi është ajo mes Partizanit dhe Romës, që do të zhvillohet në 12 gusht në Tiranë.
