Aldo Ibrahimi dhe Ylli Grabovari janë arrestuar për vrasjen e 32-vjeçares Luljeta Preza, trupi i pajetë i së cilës u gjet paraditen e djeshme poshtë urës së Dajlanit në Durrës.
Dy të arrestuarit akuzohen se kanë goditur me thikë të renë, e cila punonte si prostitutë.
Lidhur me krimin janë proceduar edhe 3 vajza të tjera, të cilët sipas hetimeve kanë qenë prezente gjatë ngjarjes, për moskallëzim të krimit.
Nga veprimet hetimore, njofton policia, ka rezultuar se 32-vjeçarja, 2 autorët e vrasjes dhe 3 të proceduarat, gjatë ngjarjes së ndodhur poshtë urës së Dajlanit, kanë qenë nën efektin e lëndëve narkotike.
Vrasja
Trupi i pajetë i 32-vjeçares u gjet poshtë urës së Dajlanit, ditën e djeshme, rreth orës 10:35.
Pas kësaj, nisën hetimet që çuan në identifikimin e autorëve të vrasjes – Aldo Brahimi 22 vjeç, banues në Lushnjë dhe Ylli Grabovari 45 vjeç, banues në Durrës. Ata akuzohen për veprën penale “Vrasja me dashje”, kryer në bashkëpunim.
“Nga hetimet e thelluara të kryera menjëherë pas ngjarjes, rezultoi se rreth orës 01:00 të datës 02.08.2023, poshtë urës së Dajlanit, Durrës, 32-vjeçarja është konfliktuar me shtetasit Aldo Brahimi dhe Ylli Grabovari, për motive të dobëta (pasi kanë konsumuar lëndë narkotike kokainë, së bashku me shtetaset B.S., M.M. dhe me një 15-vjeçare). Gjatë konfliktit, Brahimi e Grabovari kanë goditur me mjet prerës (thikë) shtetasen Luljeta Preza, e cila si pasojë ka humbur jetën në vendin ku iu gjet trupi”, njoftoi policia.
Gjithashtu, për këtë rast u referuan materialet në Prokurori ku nisi procedimi në gjendje të lirë për shtetaset B.S., 28 vjeçe, M. M., 26 vjeçe dhe për 15-vjeçaren, për veprën penale ‘Moskallëzimi i krimit’. Blutë thonë se ato kanë qenë prezente gjatë ngjarjes, por asnjëra nuk ka kallëzuar në Polici.
Sipas burimeve policore, dyshohet se të arrestuarit kishin rolin e tutorëve dhe konflikti mes palëve dyshohet se ka lidhje me një shumë parash – 20 mijë lekë të vjetra, që ata pretendonin se Luljeta duhet tu paguante.
