Skënderbeu merr më në fund lajmin e mirë për sa i përket mbërritjes në ekip të dy prej lojtarëve që mendohet të jenë pjesë e padiskutueshme e formacionit për sezonin e ri.
Bëhet fjalë për ganezin Randi Dumfur, i cili është nën kontratë me Skënderbeun dhe sulmuesin xhamajkan, Zhordan Fleçer, që është afrimi i bujshëm i bardhekuqve në këtë merkato vere.
Burime pranë klubit tregojnë se dy lojtarët kanë mbyllur të gjitha procedurat e pajisjes me vizë pune në Shqipëri dhe më 2 ose 3 gusht mbyllet gjithçka. Nisur nga ky fakt, pritet që mbërritja e tyre të bëhet në javën e dytë të gushtit, rreth datës 6 ose 7 gusht.
Trajneri Ivan Gvozdenoviç ka thënë se dy lojtarët kanë pasur një plan individual stërvitor dhe kur të mbërrijnë do të kalojnë në “sitë”, për të parë nëse e kanë respektuar në maksimum.
Natyrisht, meraku më i madh është për 24-vjeçarin Fleçer, i cili do kohën e duhur të përshtatet me skuadrën dhe nuk dihet nëse do të jetë gati për Skënderbeun që në javën e parë të kampionatit më 19 gusht.
Enigmë mbetet çështja e rikthimit të Alfred Mensah në ekipin korçar. Sulmuesi i Partizanit i është nënshtruar së fundmi një operacioni në apendicit dhe nuk dihet ende se kur do të rikthehet të vrapojë.
Nga ana tjetër, mes klubeve nuk ka një datë zyrtare se kur mund të bëhet kalimi i tij në Korçë për aq kohë sa Partizani nuk e ka mbyllur aventurën europiane. Fakt është që Mensah, edhe pse nuk është në formacionin e kuq, ka luajtur si zëvendësues në të tria ndeshjet e deritanishme.
Mësohet se klubi korçar pret një zgjidhje përfundimtare deri më 3 gusht për rikthimin e mundshëm të ganezit.
Trajneri Gvozdenoviç ka thënë se po e presin lojtarin, por në rast se do të dështojë rikthimi i Mensahut në Korçë, klubi ka gati planin B për të afruar një tjetër sulmues, që pritet të jetë nga kontinenti afrikan.
