Kur jemi në kulmin e fazës përgatitore, bardhekuqtë ende nuk kanë mbyllur çështjen e sulmit, që vijon të jetë i boshatisur dhe pa një zgjidhje konkrete për trajnerin Ivan Gvozdenoviç.
Aktualisht numri një i pankinës korçare ka në dispozicion vetëm Ardit Nikajn dhe të riun Beçka, ndërsa lojtarët e tjerë ende nuk po duken.
Nëse xhamajkani Fleçer pritet të mbërrijë në Korçë sapo të pajiset me vizë, pasi kontrata është nënshkruar elektronikisht, krejt ndryshe qëndron situata përsa u përket emrave të tjerë të repartit të avancuar.
I pari është ganezi Sumaila Abubakar, i cili mbylli sezonin me korçarët dhe kishte një kontratë të vlefshme edhe për dy sezone të tjera.
Sulmuesi 20-vjeçar luajti 25 ndeshje në kampionatin e Kategorisë së Parë dhe shënoi 7 gola, ndërsa ka gjetur edhe 1 herë rrugën e rrjetës në Kupën e Shqipërisë.
Burime në klubin bardhekuq tregojnë për “Panorama Sport” se lojtari nuk do të jetë më pjesë e Skënderbeut.
Mësohet se pas një “telenovele” të gjatë, me premtime për rikthimin dhe më pas hezitim nga vetë lojtari, kanë detyruar klubin që të negociojë prishjen e kontratës, duke i dhënë lejen e kalimit. Mesa duket sulmuesi ka kërkuar me ngulm një ekip jashtë Shqipërisë.
Veç Abubakarit, korçarët po humbasin shpresat për një tjetër ganez. Bëhet fjalë për sulmuesin Alfred Mensah, që vijon të jetë pjesë e Partizanit. Çdo gjë do të qartësohet pas mbylljes së angazhimit të të kuqve në Europë, në një kohë që në parim ka një akord mes palëve.
