Ka përfunduar procesi i votimit në zgjedhjet e pjesshme te Rrogozhinës të mbajtura këtë të dielë, të nisura që prej orës 07:00 dhe të drejtë vote kanë patur rreth 33 mijë qytetarë, të cilët kanë votuar në 53 qendra votimi.
Zgjedhjet u ripërsëritën pas vendimit të marrë nga Kolegji Zgjedhor, pas kontestimeve nga opozita dhe konstatimit të problematikave të shumta në zgjedhjet lokale të 14 Majit.
Në ato zgjedhje triumfoi kandidati i PS-së, Edison Memolla me 21 vota diferencë nga kandidati i koalicionit “Bashkë Fitojmë”, Shkëlqim Hoxha, por vendosi kutia e burgut, por duhet theksuar se të burgosurit ditën e sotme nuk kanë patur të drejtë vote.
Pjesëmarrja në këto zgjedhje u konsideruar e lartë, pasi deri në orën 18:00 sipas KQZ-së kanë votuar 36.04%. Në zgjedhjet e 14 majit pjesëmarrja në total ka qenë 32.02%.
Pritet transportimi i materialeve zgjedhore drejt KZAZ-së dhe më pas nisja e numërimit të votave. Do të jenë 5 grupe që do të numërojnë votat e sotme, por mbetet të shihet nëse do të numërohen menjëherë apo jo, për shka se disa prej numëruesve, mësohet se kanë qenë gjatë ditës dhe në rolin e vëzhguesve apo komisionerëve.
Mbetet me interes rezultati nëse pjesëmarrja më e lartë ka shkuar në favor të opozitës apo jo.
Ditën e sotme janë hasur deri në 4 – 5 raste të tentativës së fotografimit të votës. Për shkak të kësaj problematike në qendrën e votimit 22-23, çoi edhe në ndërprerjen e procesit për disa minuta. Për këtë incident reagoi menjëherë edhe Kryekomisioneri Ilirjan Celibashi, i cili tha se shqetësim mbetet edhe votimi familjar.
“Fotografimi i votës përbën një shkelje të rëndë të ligjit penal, ka sanksione dënimi që shkojnë deri në 3 vjet. U bëj thirrje të gjithë votuesve që t’i shmangen çdo lloj joshje nga subjektet për t’u treguar atyre se për kë kanë votuar. Ata rrezikojnë shumë në këtë rast. Votimi familjar gjithashtu përbën shkelje. Ky është një problem, sa të kemi mundësi do ta adresojmë.”
Ndërsa nënkryetarja e KQZ, Lealba Pelinku, pas vëzhgimit në terren konstatoi një pjesëmarrje të lartë të personave të paautorizuar në qendrat e votimit.
“Jam drejtuar drejt kësaj qendre për të parë se çfarë ka ndodhur. Komisioni duhej të mbante procesverbal. Unë e hasa personalisht në 4 qendra votimi në shkollën Lekaj, ku vihej re një prani personash të pautorizuar pa bexh që nuk duhet të rrijnë në qendrat e votimit.”
Gjatë gjithë ditës ka patur denoncime të shumta nga ana e opozitës për presion ndaj votuesve, manipulime të procesit zgjedhor, si dhe vënien e administratës në shërbim të Partisë Socialiste.
Gjatë pasdites, kreu i PD-së, Sali Berisha, publikoi në rrjetet sociale dhe një video ku një çift denonconin se si njerëz të kandidatit të PS-së, Edison Memolla i kishin kërcënuar se nëse nuk votonin në favor të kandidatit socialist, ata nuk do i linin me kaq.
