Nga BoldNews.al
Kryetarët e bashkive i kanë kthyer zyrat e shëtit në oaze të qejfeve të tyre. Rasti i Gjicit solli një shkundje, por sërish këta persona i konsiderojnë ambientet apo paratë si “të tyre”.
Nga jugu në veri, nga lindja në perëndim, të gjitha me radhë fillimisht mendojnë për vete, japin tendera me përfitime vetjakë, bëjnë vila në ato rrethe, blejnë shtëpi në Tiranë dhe në fund mendojnë edhe për ndonjë vilë apartament në bregdet. Shumica e kryetarëve të rretheve jetojnë në Tiranë, pra e bëjnë punën “part time”, teksa e gjitha kjo rëndon në mungesë shërbimi ndaj qytetarëve. Por firma te letrat hidhet edhe nga Tirana apo edhe nga vende të tjera, aktualisht edhe nga zona e plazhit.
Në këto radhë do të ndalemi te një procedurë e dyshimtë e Bashkisë së Lezhës, e cila në këto ditë të nxehta korriku ka menduar edhe për udhëtime qejfi në Europë. Madje, me të gjitha shpenzimet e hequra nga buxheti i asaj bashkie. Që nga bileta e udhëtimit, shpenzime për qëndrimin e deri te bagazhe deri në 20 kilogramë. “Paketa turistike” është për plot 3 ditë e 4 netë, teksa duket se i përfshin të gjitha. Megjithatë, pas këtyre procedurave, lindin disa pyetje: çfarë pune do të bëjë Bashkia e Lezhës në Hungari? Me cilin do të binjakëzohet? Udhëtime qejfi apo pune?
Sipas dokumenteve që disponon redaksia e BoldNews.al, Bashkia e Lezhës ka hapur këto ditë procedurën e prokurimit për blerjen e biletave të transportit ajror ndërkombëtar. Objekt i kësaj procedure është “shpenzime udhëtimi për 3 punonjës në Budapest, Hungari”. Mësohet se janë blerë urgjentisht 3 copë bileta, ku nisa për në kryeqytetin e Hungarisë është bërë në datën 17 korrik 2023. Nisja nga Aeroporti i Rinasit për në Budapest. Kthimi do të bëhet në datë 20 korrik 2023 në orën 15.30. Pra, një paketë e plotë turistike për 3 punonjës. Por, nuk përfundojnë këtu benefitet e tyre.
“Çmimi i secilës bilete duhet të përfshijë minimum 1 bagazh minimum 20 kg.
Operatori i renditur i pari, përpara se të shpallet fitues, duhet të dorëzojë nëpërmjet sistemit të prokurimit elektronik dokumentet si më poshtë: Rezervimin e biletës, sipas destinacionit të kërkuar, me itinerar te detajuara. Afati i dorëzimit të dokumenteve është brenda 2 orëve. Afati i realizimi të shërbimit deri më datë 20 korrik 2023” thuhet në dokumentet e tenderit.
Po përse gjithë kjo emergjencë, pasi biletat u kërkuan të bliheshin brenda 2 orëve. Kush e ka pasur gjithë këtë emergjencë? Kryetari Pjerin Ndreu, i cili ka edhe emrin dhe firmën në fund të dokumentit apo ndonjë punonjës tjetër? Nëse do të kërkosh në rrjetet sociale të vetë kryetarit apo në faqen zyrtare në internet të Bashkisë së Lezhës nuk do të gjesh asnjë njoftim për këtë udhëtim.
Dhe, në mungesë të këtij informacioni, redaksia jonë po e pyet publikisht; Kush udhëtoi në Hungari? Çfarë agjende kanë punonjësit? Përse po qëndrojnë 4 ditë e 3 netë? Cilin qytet dhe cilin punonjës do të takojnë në atë shtet?
