Armando Broja mund të ndryshojë skuadër gjatë ditëve të ardhshme. Ky është lajmi i bujshëm që vjen nga Italia, ku është bërë e ditur edhe se sa do të jetë vlera e kartonit të sulmuesit shqiptar në një transferim që mund të ndryshojë dinamikat e karrierës së tij.
Lojtari shqiptar është lënë në Londër nga Çelsi, duke mos udhëtuar drejt SHBA për fazën përgatitore. Por nëse mendohej fillimisht se kjo ishte për shkak të gjendjes së tij jo më të mirë të mundshme fizike, në Itali janë sigurt se kjo ka lidhje me transferimin e tij te një tjetër klub londinez.
“La Gazzetta Dello Sport” bën të ditur se brenda pak ditësh pritet finalizimi i marrëveshjes, me Brojën që do të transferohet për rreth 35 milionë euro te fituesit e Ligës së Konferencës. Marrëveshja në fakt është zbuluar pasi ky transferim po ndiqet me shumë interes nga Roma.
Kalimi i Brojës te Uest Hem do t’i hapte rrugë blerjes nga verdhekuqtë të Xhanluka Skamaka, i cili zhgënjeu plotësisht në vitin e tij të parë në Angli dhe po kërkon kthimin në Serinë A. Me një investim aq të rëndësishëm për Brojën, është e qartë se sulmuesi italian do të ishte i sakrifikuari, duke i hapur rrugën Romës që të bëjë ofertën e saj për të marrë futbollistin e Italisë.
