Teuta ka nisur prej disa ditësh fazën përgatitore në Bansko të Bullgarisë, teksa është grumbulluar në resorin “Maraya Hotel Bansko”.
Kushtet janë ideale dhe me temperatura të favorshme, me disa gradë më poshtë nga ato të Durrësit.
Ditën e sotme klubi bregdetar njofton mbylljen e ditës së katërt së përgatitjeve, me grupin e futbollistëve që janë në gjendje optimale dhe gati për sfidat në horizont.
Teuta sfidon 4 klube dhe një Kombëtare në miqësoret që do të zhvillojë gjatë fazës përgatitore në Bullgari.
Mësohet se durrsaket do të luajnë kundër ekipit kombëtar të Kirgistanit më 26 korrik.
Testet për Teutën nisin të hënën më 17 korrik ndaj Brera Strumica, e cilësuar deri pak muaj më parë si “Akademia Pandev”, me aksionar ish-sulmuesin e Interit, Goran Pandev.
Ndeshja e fundit në Bullgari e Teutës do të jetë më 30 korrik përballë klubit nga Turkmenistani, Altyn Asyr.
Dy të tjerat janë parashikuar ndaj skuadrës rumune të ligës së dytë, CSC 1599 Selimbar dhe maqedonasit e Bregalnica Shtip. Datat e këtyre ndeshjeve do të konfirmohen në vijim.
