Janë publikuar pamjet e sherrit të dhunshëm të regjistruara ditën e djeshme në një lokal në aksin rrugor Fushë Krujë-Thumanë, ku grupi i fisit Rraja, i përfshirë dhe Xhelal Rraja, vëllai i deputetit socialist Rrahman Rraja rrahën brutalisht Bilbil dhe Jashar Majën,
Siç shihet dhe nga pamjet e publikuara nga mediat, janë rreth 10 epersona të cilët me shkopin bejsbolli, grushte dhe shqelma sulmojnë Bilbil dhe Jashar Majën që ishin të ulur në lokal për të pirë kafe. Ata shihen teksa i shajnë dhe i godasin pa pushim me shkopinj në trup e kokë dy “shënjestrat”.
Njëri prej të dhunuarve, i cili ndodhet aktualisht në gjendje të rëndë në spital, shihet i gjakosur në kokë teksa përpiqet të largohet. Por sërish autorët e sulmit i vihen pas, deri sa aie bie në tokë dhe ata ende vazhdojnë e godasin akoma. Në sfond dëgjohen zëra që thonë “vrite, vrite” dhe vijojnë gjuajtjet me shkopinj e shqelma. Siç mund ta dalloni dhe në fotot e mëposhtme, një prej tyre shihet dhe me armëzjarri tip pistoletë në dorë.
Sherri ka ndodhur për një gurore, në pronësi të Rrajave. Bilbil dhe Jashar Maja janë ankuar dhe kanë denoncuar në polici për tronditjet që u japin shpërthimet dhe dëme në banesa. Kjo ka sjellë dhe “hakmarrjen” e Rrajave, duke i rrahur brutalisht.
Bëhet me dije se Xhelal Rraja, vëllai i deputetit socialist Rrahman Rraja i cili është një nga personat e përfshirë në konflikt është edhe administratori i një guroreje.
Pas ngjarjes, Policia bëri me dije se ka shoqëruar në Polici shtetasin Xhelal Rraja, dhe P. Rraja, si dhe po punohej për shoqërimin e shtetasve I. Rraja, dhe K. Rraja.
