Nga Boldnews.al
Shiu i rrëmbyer i ditëve të fundit i ka nxjerrë “bojën” një tenderi të majmë në Mirditë. Bëhet fjalë për tenderin me vlerë 3.5 milionë euro, të përfunduar vetëm 7 muaj më parë, i cili duhet të rikonstruktonte ambientet në bashkë pronësi. Por, megjithëse është bërë fasada, shiu ka nxjerrë zbuluar të metat e kësaj procedure, pasi uji është futur në brendësi të pallatit.
“Këtu në Rrëshen janë bërë punime me veshje kapot të pallateve. Dhe sot (të dielën) me 5 minuta furtunë, ka hy uji në të gjitha katet dhe ka prishur parketet. Dhe do të hyjë gjithmonë nga cilësia e dobët e punimeve”, tha një banor për redaksinë e BoldNews.al.
Të tjerë banorë pohojnë për redaksinë se pallati me këto probleme është në qytetin e Mirditës. “Janë pallatet parafabrikat që ka ba Shpani (Ndue Shpani, ish deputet) veshje kapot të gjitha pallateve” pohon një tjetër banor.
Në videot më sipër, banorët tregojnë se uji futet në të çarat e parafabrikateve dhe jo nga dritarja. “Pallatet janë të vjetra të vitit 1985. Këto veshje janë bërë disa kohë më parë. Para se të bëheshin këto veshje, s’ka pas hyrë uji kurrë në këto pallate. Punimet kanë përfunduar. Kanë vendosur polesterol të dobët 25 mijë lekë metër kubi, ku polesteroli për sistem kapot duhet të jetë 130 euro” pohon një tjetër banor. Pothuajse të gjitha pallatet parafabrikat në Mirditë kanë probleme thonë banorët, teksa shtojnë se punimet janë bërë nga firma në pronësi të ish – deputetit Ndue Shpani.
BoldNews.al shfletoi dokumente nga Agjencia e Prokurimit Publik ku rezultoi se tenderi është fituar nga firma “ULZA” shpk. Bëhet fjalë për procedurën e përshpejtuar rindërtimi, teksa tenderi është bërë në datën 24 mars 2022. Objekti i tenderit është “rikonstruksion dhe riparim të mjediseve në bashkë pronësi ose të përbashkëta në ndërtesa (pallate), në qytetin Rrëshen dhe Rubik”. Kohëzgjatja e kontratës ka qenë 12 muaj, teksa mësohet se pallatet janë bërë shkel e shko edhe para afatit, nga “frika” e zgjedhjeve në Mirditë. Tenderi është bërë nga Bashkia Mirditë. Në tender kanë marrë pjesë operatorët ekonomikë ‘ULZA’ me vlerë 362.526.402 lekë dhe afat realizimi 11 muaj. Pra, një tender me vlerë plot 3.5 milionë euro.
Sipas Qendrës Kombëtare të Biznesit, firma “ULZA” SHPK është në pronësi me 70 % të z. Ndue Shpani. Z. Shpani është një biznesmen, i cili ka qenë anëtar i Partisë Demokristiane të Shqipërisë (PDK), Sekretar i Përgjithshëm i PDK-së (Gusht 2015). Madje, deputet në Kuvendin e Shqipërisë nga lista shumë emërore e PDK-së në vitet 2005-2009. Krahas këtij tenderi, kjo firmë ka fituar shumicën e procedurave në Mirditë, Rubik, Milot, Reps etj. Pra, në zonat e influencës së z. Shpani. Edhe herë të tjera, firma është denoncuar për punime të dobëta kryesisht në pallatet në Reps apo edhe në Rubik. Tashmë, me problemet në Rrëshen kompletohet e gjitha panorama e rindërtimti në Mirditë, e cila veccse ka qenë një fasadë. Fasadë të cilën e ka marrë shiu i parë i rrëmbyeshëm.
