Janë zbardhur detaje të reja nga atentati i regjistruar mesnatën e kaluar në fshatin Larushkë të Fushë Krujës, në banesën e Gentjan Bejtjas, ku mbeti i vrarë kunati i tij, Ramazan Sina, 29 vjeç, dhe u plagosën dy djemtë e tij, 13-vjeçari Alvi Bejtja dhe djali tjetër 10-vjeçar.
Mësohet se tre personat që ka shoqëruar Policia, si persona që kanë dijeni për ngjarjen, janë personazhe të botës së njohur të krimit në atë zonë. Bëhet fjalë për Durim Bamin, Valter Bamin dhe Marklen Hakën.
Gjithashtu, mësohet se jo zyrtarisht 29-vjeçari ka punuar si shofer në prokurorinë e Apelit, por nuk specifikohet se me cilin prokuror është.
Burime nga grupi hetimor bëjnë me dije se autorët kanë lënë makinën pak larg banesës kanë zbritur në këmbë dhe kanë hapur zjarr në momentin që viktima ka qenë duke zbritur nga makina së bashku me fëmijët e mitur të Gentian Bejtjas.
Sipas dëshmitarëve të ngjarjes autorët kanë qëlluar dy herë. Njëherë tek banesa dhe 4 herë të tjera në rrugën kryesore aty ku u gjetën dhe 4 gëzhoja. Në total janë sekuestruar 28 gëzhoja.
Dyshohet se shënjestra e atentatit mund të ketë qenë Gentjan Bejtja, edhe pse në momentin e ngjarjes ai nuk ndodhej në banesë.
Gentjan Bejtja dyshohet se dy ditë më parë ka qenë në shtëpi dhe se mund të ketë qenë në automjet me viktimën mbrëmjen e djeshme, por ka zbritur më parë.
Po ashtu ka dyshime se autorët kanë pasur dijeni për lëvizjet e Bejtjas. Bejtja ka kërkuar azil në Norvegji fillimisht e më pas në Suedi, por nga informacionet kërkesat për azil nuk i janë pranuar. Ai i ka shpëtuar dhe dy atentateve të tjera.
