Një atentat me armë zjarri është regjistruar rreth mesnatës së kaluar, rreth orës 00:15, në fshatin Larushk të Krujës. Shënjestra e atentatit ka qenë banesa e Gentian Bejtjes, një emër i njohur i botës së krimit, i cili iu ka shpëtuar dhe atentateve të mëparshme.
Si pasojë e të shtënave me armë zjarri, në oborrin e banesës kanë mbetur të plagosur dy djemtë e tij, 13-vjeçar Alvi Bejtja dhe një 10-vjeçar, si dhe i është vrarë kunati Ramazan Sina, 29 vjeç, (dajë e niprinj).
13-vjeçari është transportuar me urgjencë në spital dhe ndodhet në gjendje të rëndë shëndetësore, ndërsa vëllai i tij 10 vjeç ka mbetur i plagosur lehtë.
Policia ka gjetur një automjet të djegur tip “Volkswagen”, rreth orës 00:40, te lapidari në Tapizë dhe dyshohet se iu përket autorëve.
Grupi hetimor nën drejtimin e Prokurorisë ndodhet në vendngjarje dhe vijon veprimet hetimore për sekuestrimin e provave me qëllim identifikimin dhe kapjen e autorit/ëve.
Kush është Gentjan Bejtja
Gentjan Bejtja së bashku me Enver Stafukën, ishin personat që vodhën makinën e përdorur për vrasjen e kryekomisar Dritan Lamajt në shkurt të vitit 2013. Gjithashtu, ish-polici Bejtja i ka shpëtuar edhe një atentati me minë të telekomanduar në vitin 2016.
Bejtja i ka shpëtuar edhe më parë atentatit, ku në vitin 2022, ndaj tij është qëlluar me breshëri kallashnikovi teksa lëvizte me makinë në zonën e Niklës, i shoqëruar nga Klodian Stafuka. Në atë kohë Gentian Bejtja mbeti i plagosur.
Gentjan Bejtja rezulton person me precedentë penalë të mëparshëm në fushën e veprave penale kundër personit dhe pronës, si dhe i arrestuar me arsenal armësh në banesë.
