Ekzekutimi me armë zjarri i babë e bir, Gjokë dhe Eduart Gurra, 57 dhe 31 vjeç, pasditen e 29 qershorit në fshatin Brucaj të Dukagjinit vazhdon të jetë ende pa autor dhe pa një pistë konkrete.
Burime pranë grupit hetimor bëjnë me dije se po hetohet dhe mbi një sherr me grushta të ndodhur një vit më parë mes 57-vjeçarit dhe një banori të fshatit. Ky konflikt konfirmohet si nga familjarët e viktimave, po ashtu edhe nga banorët e fshatit. Shkaku i konfliktit ka qenë tregtimi i lëndëve drusore, punë me të cilën Gjokë Gurra merrej që pas vitit 2008 kur u largua nga Policia e Shkodrës.
Konflikti mes Gjokë Gurraj dhe bashkëfshatarit të tij një vit më parë kaloi në heshtje por policia dyshon se ky sherr mund të jetë bërë shkak për krimin e dyfishtë të regjistruar më 29 Qershor.
Po ashtu, një pistë tjetër dyshohet se të jetë dhe kultivimi i lëndëve narkotike, pasi zona e njësisë administrative Pult, njihet si një “zonë e kuqe” për kultivimin e kanabisit. Dyshohet se si kryeplak i fshatit Bruçaj, Gjokë Gurra të ketë raportuar në Polici për zonat ku janë mbjellë kanabis.
Mësohet se ata janë qëlluar me breshëri kallashnikovi, ndërsa kanë qenë brenda në makinë duke udhëtuar drejt banesës së tyre të djegur në Dukagjin, e cila ishte djegur qëllimisht.
Babë e bir, Gjokë dhe Eduart Gurra janë qëlluar për vdekje brenda makinës së tyre me breshëri kallashnikovi në një kthesë në një zonë të pyllëzuar, afro 500 metër pa mbërritur tek banesa e djegur qëllimisht nga autori.
Djegia e banesës dyshohet se ka qenë plan i autorëve, për t’i nxjerrë në pritë viktimat, pasi Gjokë dhe Eduart Gurra, banonin në lagjen “Partizani” në Shkodër. Familja Gurra u njoftua për djegien e banesës dhe sot babë e bir shkuan të shikonin dëmet materiale, pasi në banesën në fshat nuk banonte njeri.
Autori i kanë zënë pritë pasi kanë pasur informacionin e saktë se dy viktimat po shkonin drejt banesës së tyre të djegur dhe aty nga distanca i kanë qëlluar me breshëri plumbash.
Nga ekspertiza paraprake ka rezultuar se nga gëzhojat e sekuestruara në vendin e ngjarjes është qëlluar nga një armë e vetme e tipit kallashnikov. Në vendngjarje janë sekuestruar 8 gëzhoja.
