Deputeti i Partisë Demokratike Tritan Shehu ka reaguar në lidhje me mbylljen e nismës së Ballkanit të Hapur, të deklaruar nga kryeministri Edi Rama një ditë më parë.
Në një postim në rrjetet sociale, Shehu shkruan se “Ballkani i Hapur” po varroset me litarin jashtë, pasi sipas tij, historia nuk ka mbaruar dhe se fantazma e tij vazhdon të endet rreth nesh. Më tej, ai rendit dhe tre arsyet pse pasojat e kësaj nisme do të vazhdojnë gjatë.
Reagimi i plotë:
Ballkani i Hapur “varroset” me “litarin” jashtë!
Deklarimi i detyruar i Ramës për “avullimin” e Ballkanit të Hapur, pa asnjë argument ishte si promovimi, që po ai i bëri këtij projekti të Vuçiçit në Nish.
Ballkani i hapur po “varroset” ashtu siç u promovua, në konspiracion të plotë!
Si një nismë konspirative kundër Procesit të Berlinit, Perëndimit, Kosovës, shqiptarëve e të ardhmes europiane të rajonit.
E ëndërruar në Beograd, përpunuar në Moske, e mbështetur edhe diku në Lindje.
Dhe si çdo veprimtari e tillë konspirative, me implikime ndërkombëtare, pasojat e tij vazhdojnë gjatë edhe mbas arshivimit sepse:
1- Dëmet e krijuara janë të gjëra e duhet kohë të tejkalohen.
2- Shumë prej të cilëve akoma nuk janë të dukshëm, pra koha do të evidentojë të tjerë.
3- Në tërësi ato lidhen me tjetërsime të historisë së Rajonit tonë, qëndrime kokëposhtë strategjike politike, deformime të ekonomisë së tregut, konkurrencës së ndershme në Rajon, etj.
Të gjitha këto duke synuar realizimin e ëndrrës serbe “Jugosllavia e re”!
Pra Ballkani i hapur edhe i “varrosur”, ka lënë mbi tokë “litarin” e tij.
Historia nuk ka mbaruar…
Fantazma e tij vazhdon të endet rreth nesh!
