Studentët e mjekësisë duket se nuk kanë ndërmend të heqin dorë nga kërkesat e tyre dhe kanë njoftuar datën e protestës së radhës. Ajo është paralajmëruar se do të mbahet ditën e martë, më 4 Korrik, ditë e cila përkon dhe me vizitën e ish presidentit të SHBA, Bill Klinton i cili do të jetë në Shqipëri me rastin 4 korrikut, ditën e Pavarësisë së Shteteve të Bashkuara të Amerikës.
Më herët, studentët e mjekësisë kanë zhvilluar dhe dy protesta të tjera, pasi janë kundër vendimit të Qeverisë, i cili i detyron të punojnë pesë vite në Shqipëri pas përfundimit të studimeve. Kjo është konsideruar diskriminuese nga ana e studentëve.
Propozimi është i tillë që studentët që nisin vitin e parë në mjekësi në tetor do të lidhin kontratë për të ofruar shërbim shëndetësor për 5 vite në vend ,pa i penguar për të bërë edhe specializimin brenda Shqipërisë ose jashtë saj. Ndërsa për studentët që janë duke e ndjekur mjekësisë aktualisht detyrimi mund të jetë 3 vjet.
Ministrja Ogerta Manastirliu u prononcua pak ditë më parë për revoltën e studentëve të mjekësisë, ku tha se janë ende në fazë shumë të gjerë konsultimi, dhe se nuk ka ende një vendim konkret.
“Ne kemi ndërmarrë një proces të gjerë konsultimesh, takimesh me studentët e mjekësisë, me rektorë dhe dekan për të krijuar bazën më të mirë të diskutimeve. Në momentin që qeveria do ketë një model për ta caktuar, do u’a përcjellim”, tha Manastirliu.
Studentët kanë listuar edhe disa kërkesa.
Kërkesat e studentëve
1. Dalje publike të një prej Ministrive apo e Rektoratit ku të deklarojë publikisht që ky draft nuk do të vazhdojë të hartohet dhe ndërprerjen imediate të propozimit, pasi bie ndesh me Të Drejtat dhe Liritë e personit për të zgjedhur lirisht pa asnjë detyrim profesionin, vendin e punës dhe kualifikimet e tij.
a. Të përmirësohen kushtet e sallave të seminareve dhe leksioneve dhe ndërtimin e sallave të reja me kapacitet mbajtës për të gjithë studentët e një paraleli.
b. Të vihen ne dispozicion ambiente të posaçme (Qendra e Simulimit) për kryerjen e praktikave (psh: intubim, vendosje e vigonave, praktikimi i ndihmës së parë etj)
c. Ndërtimi i bibliotekave të aksesueshme në çdo orar të ditës nga studentët.
3. Rivlerësimi i të gjithë literaturës nga një komision i posaçëm dhe ngritja sa më parë e grupeve të punës për krijimin e literaturave të reja sipas standardeve evropiane.
4. Standardazimi i kryerjes së praktikave nëpër pavijone dhe vendosja e mjekëve specializante si mentorë për studentët për kryerjen sa më mirë të cikleve klinike.
5. Ringritjen sa më parë të strukturave të Qeverisë Studentore.
