Pas konferencës së përbashkët të ministrit të Brendshëm dhe kreut të policisë, ky institucion ka publikuar pamje nga aksioni në kampin e MEK në Manzë.
Në pamje, policia sjell rezistencën e anëtarëve të kampit ku strehohen muxhahedinët ndaj aksionit. Në videon që duket se është filmuar me dron shquhet një person teksa tenton të djegë disa dokumenta.
Vetë kreu i policisë Muhamet Rrumbullaku tha se anëtarët e MEK kanë tentuar të djegin dokumenta dhe njësi kompjuterike.
Kontrolli, sqaroi ai, erdhi në zbatim të një vendimi të gjykatës së Posaçme në kuadër të një hetimi nga SPAK.
Një person mbeti i vdekur teksa aksioni policor zhvillohej, ndërsa anëtarët akuzuan se vdekja e tij erdhi si pasojë e dhunës fizike nga policia dhe gazi lotsjellës. Policia ndërkohë tha se s’ka pasur dhunë në asnjë moment dhe është përdorur spraj e jo gaz lotsjellës. Sipas bluve, vdekja e anëtarit të MEK ka ardhur për shkaqe që s’ka lidhje me operacionin.
