Gjykata Kushtetuese vendosi këtë të Enjte të rrëzojë kërkesën e paraqitur nga 1/5 e deputetëve të Kuvendit, që kërkuan shfuqizimin e vendimit të Qeverisë për konfiskimin e ndërtimeve pa leje.
Në një njoftim për mediat, GJK thotë se ky vendim është përfundimtar dhe hyn në fuqi ditën e botimit në Fletoren Zyrtare. Më tej, sqaron se vendimi përfundimtar do të shpallet i arsyetuar “brenda afateve ligjore të parashikuara nga ligji nr. 8577, datë 10.02.2000 ‘Për organizimin dhe funksionimin e Gjykatës Kushtetuese të Republikës së Shqipërisë’, i ndryshuar dhe nga Rregullorja për procedurat gjyqësore të Gjykatës Kushtetuese”.
Deputeti demokrat Gazment Bardhi, i cili ishte një ndër firmëtarët e kërkesës, u shpreh se vendimi i sotëm i Kushtetueses u ndikua ndikuar nga kryeministri Edi Rama dhe oligarkët.
“Asnjë surprizë! Vendimin e sotëm të Gjykatës Kushtetuese e ka shpallur Edi Rama më 15.12.2022, ku kërkoi nga GJK të mos lajthisë dhe e sfidoi hapur duke paralajmëruar moszbatimin e çdo vendimi të ndryshëm. Për fat të keq Gjykata Kushtetuese nuk i rezistoi dot presionit dhe shantazhit të Kryeministrit dhe oligarkëve të tij! VKM-ja që legalizon ndërtimet pa leje të oligarkëve është thelbi i qeverisjes së Edi Ramës: Burg për qytetarët e thjeshtë, amnisti dhe legalizim për oligarkët”, shkroi Bardhi në një postim në rrjetet sociale.
Në tetor 2022, njëzetetetë deputetë demokratë dorëzuan një padi në Gjykatën Kushtetuese me kërkesën për shfuqizimin e VKM-së së miratuar më 7.9.2022 pasi sipas tyre, cënon barazinë e qytetarëve para ligjit.
Ndërtimi pa leje është krim në Shqipëri dhe Kodi Penal parashikon dënime deri në 5 vjet burg për qytetarët e zakonshëm dhe 8 vjet burg për objektet me qëllime fitimi. Megjithatë, Këshilli i Ministrave i anashkaloi këto sanksione përmes një vendimi të miratuar më 7 shtator 2022, i cili u jep ndërtuesve të mëdhenj një mundësi për t’i ligjëruar shtesat apo godinat e paligjshme, në këmbim të një pagese financiare apo dhënies së sipërfaqeve në favor të shtetit. Vendimi parashikon procedurat e transferimit të sipërfaqeve të paligjshme nga subjektet private te shteti dhe anasjelltas dhe nuk e përmend në mënyrë eksplicite ndjekjen penale. Për ekspertët e ligjit, ky vendim përbën një anashkalim të rendit juridik si dhe vendos një standard të dyfishtë mes biznesmenëve të mëdhenj dhe qytetarëve të zakonshëm.
Më herët, gjatë një seance në Kushtetuese, përfaqësuesja e qeverisë Elira Kokona, kërkoi pushimin e gjykimit. Sipas Kokonës, subjekti paditës nuk legjitimohet formalisht, pasi dy nga firmëtarët e kërkesës, Grida Duma dhe Alfred Rushaj nuk janë më deputetë. “Duhet të jenë 28 deputetë që të vënë në lëvizje gjykatën,” tha përfaqësuesja e qeverisë.
Ndërkohë, deputeti demokrat Gazment Bardhi kundërshtoi pretendimet e qeverisë me argumentin se 28 firmëtarët kanë qenë deputetë kur firmosën dhe gjykata është vënë në lëvizje përpara se dy deputetët të dorëhiqen. “Me këtë logjikë i bie që nëse Presidenti i Republikës vendos në lëvizje Gjykatën Kushtetuese dhe nëse ai qëllon që i mbaron mandati, apo vdes, i bie që çështja të mbyllet,” tha Bardhi.
