10 lopë kanë ngordhur ditën e sotme në Mirditë si pasojë e kontaktit me rrymën elektrike.
Mësohet se ngjarja ka ndodhur në fshatin Lufaj, ku lopët kanë qënë duke kullotur, kur linja e amortizuar e shpërndarjes së rrymës elektrike është shkëputur dhe ka rënë në tokë.
Lopët i përkisnin një fermeri të zonës, i cili kërkon dëmshpërblim.
Shërbimet e komisariatit të Mirditës dhe ekspertë të sektorit të blegtorisë kanë mbërritur në vendin e ngjarjes, për të përcaktuar shkaqet. Linjat energjitike në fshatin Lufaj por në tërësi në gjithë Njësinë Administrative të Mirditës janë në kushte mesjetare, me tela nëpër shtylla të kalbura druri apo lidhur në pemë e bimësi.
Fermeri P.Gj, pret përfundimin e veprimeve hetimore për të kërkuar më pas kompensimin e dëmeve që janë të paktën 10 milion lekë.
Vlen për tu përmendur, se rrjeti i amortizuar i shpërndarjes së energjisë rrezikon edhe jetën e banorëve të zonës.
