Në shumë vende evropiane kryesisht në Britani është shtuar numri i personave që paraqiten në spital si pasojë e përdorimit të “vape”. Ajo erdhi si një alternativë e duhanit, por që sipas mjekëve, ka tendenca më të mëdha varësie, kryesisht te të rinjtë.
Mjeku pneumolog, Ardian Jorgji u shpreh se përdorimi i këtyre pajisjeve elektronike është mjaft i dëmshëm, jo vetëm për personin që e konsumon, por edhe për të tjerët që qëndrojnë pranë tyre.
Në një intervistë për BW, mjeku shprehet se kolapsi me shtrimet në spitale që po përballet aktualisht Britania e Madhe, mund të përsëritet edhe në Shqipëri, pasi për të rinjtë, është kthyer në një trend me masivitet të gjerë.
“përdorimi i këtyre pajisjeve elektronike është mjaft i dëmshëm, jo vetëm për personin që e konsumon, por edhe për të tjerët që qëndrojnë pranë tyre”.
“Përdorimi i tyre krijon inflamacion në mushkri dhe varësi. Këto alternativa iu drejtuan duhanpirësve por kjo alternativë është bërë modë duke iu drejtuar moshave të reja. Në një moshë kaq të hershme inflamacion në mushkri mban një rrezik të madh për të ardhmen. Përdorimi tek moshat e reja është alarmante sepse shkakton dëm afatgjatë”, tha mjeku.
Mjekët sugjerojnë moskonsumimin e këtyre produkteve si edhe të duhanit tradicional, që mund të sjellë në disa raste edhe dëme të parikuperueshme në organizëm.
