Hodhi pistoletën në lumë pasi pa policinë, arrestohet i riu
Një i ri është arrestuar nga policia e Pogradecit pasi akuzohet se ka hedhur armën e zjarrit në lumë, pas sinjalit të bluve për të ndaluar.
Në pranga u vu Enis Shaho, 21 vjeç, banues në Pogradec, i dënuar më parë për armëmbajtje pa leje dhe për kanosje.
Policia njofton se kishte informacione se i riu mund të lëvizte me armë zjarri dhe për këtë është organizuar një aksion për ndalimin e tij.
“Gjatë operacionit, në vendin e quajtur ‘Ura e Tushemishtit’, Pogradec, shërbimet e Policisë kanë lokalizuar automjetin në të cilin shtetasi E.Sh. po udhëtonte si pasagjer dhe i kanë bërë me shenjë të ndalonte. 21-vjeçari, sapo ka konstatuar shërbimet e Policisë, me qëllim që të shmangte përgjegjësinë penale, ka hedhur në drejtim të lumit, armën e zjarrit pistoletë që mbante në brez”, thuhet në një njoftim nga blutë.
Shërbimet e Policisë kanë gjetur në lumë, armën e zjarrit pistoletë me 6 fishekë në karikator, e cila u sekuestrua në cilësinë e provës materiale, së bashku me një shkop hekuri, një thikë dhe një celular që u gjetën në çantën e 21-vjeçarit, shtuan të njëjtat burime.
