Deputeti i Partisë Demokratike, Ervin Salianji ka shpërthyer me kritika ndaj ish-kryedemokratit, Lulzim Bashës dhe mbështetësve të tij të cilët shkaktuan dhunë në mbledhjen e Kryesisë të zhvilluar para dy ditësh.
Gjatë një deklarate për mediat në dalje të Kuvendit, Salianji u shpreh se Basha ka marrë “peng” demokratët të cilëve u kërkoi që të reagojnë me forcë për të distancuar ata që ai i etiketoi si “langaraqë të Taulant Ballës”.
“Shqetësimi nuk është se çfarë bëhet me fatet e individëve dhe ambiciet personale, partia e vulës nuk është më parti, ajo ngjarje do të ishte si një sherr mes të dehurish në një lagje. Aty është një njeri që e ka marrë peng, ish-kryetari i partisë nuk është dorëhequr, u largua për shkak të presionit të asaj kohe, vazhdon që ta marrë zvarrë atë parti, më vjen keq se do të tretet bashkë me logo.
Njerëzit e tjerë kanë kohën që të kuptojnë që bëhet fjalë për interesa të ngushta personale, aty nuk ka më anëtarë, ka më shumë pretendentë për kryetarë sesa anëtarë, ama aty ka para, aq sa nuk i shpërndajnë as për degët e tyre.
Çdo demokrat duhet të reagojë me forcë, njerëz që janë lëngaraq para Ballës, e jo më Ramës, ku është një moment vendimmarrjesh të forta, opozita duhet të rikonceptohet, qoftë në përmbajtje, qoftë me njerëz që duan të punojnë për qytetarët, për tu shkëputur nga njerëz që duan të punojnë për Edi Ramën. Ajo që duhet të diskutohet sot në fakt është mënyra se si mund të ngrihet opozita. Ka përfunduar kaposhi një thellë, dhe ta mbajnë ata që e kanë”, tha Salianji.
