GJKKO ka dhënë masën ‘arrest me burg’ për kandidatin fitues të koalicionit “Bashkë Fitojmë” për Bashkinë e Himarës, Fredi Belerin, me akuzën e korrupsionit aktiv në zgjedhje, e kryer në bashkëpunim.
Ndërkohë ditën e sotme mësohet se kryebashkiaku i zgjedhur i Himarës, Fredi Beleri ka ankimuar vendimin e Shkallës së Parë të Gjykatës së Posaçme. Beleri kërkon pushimin e çështjes, me pretendimin se nuk ka asnjë provë që ta përfshijë në veprën penale për të cilën akuzohet.
“Të pushohet çështja, nuk ka asnjë provë për shitblerje votash.”-thuhet në kërkesë.
Pritet që Gjykata e Apelit të hedh shortin që të përcaktojë emrin e gjyqtarit që do të shqyrtojë çështjen, ndërsa aktualisht Beleri ndodhet në burgun 313 të Tiranës.
GJKKO dha vendimin “Arrest me burg” për kryebashkiakun e zgjedhur të Himarës, Fredi Beleri dhe bashkëpunëtorin e tij, Pandeli Kokaveshi, dy ditë para zgjedhjeve të 14 majit. Kjo ngjarje solli reagime edhe nga pala greke, e cila ka bërë shpesh thirrje për lirimin e Belerit.
