Në një analizë të rezultatit të zgjedhjeve lokale të 14 Majit, eksperti i ekonomisë Pano Soko e kritikoi ashpër opozitën, që sipas tij nuk arriti të ngjallë frymë te elektorati, për t’i bërë shqiptarët të besojnë se duhet të votonin të dielën e kaluar.
Soko u shpreh se tashmë 95 % e bashkive në të gjithë vendin do t’i përkasin PS dhe për këtë një pjesë faji e ka opozita që nuk ngjalli shpresë te ata 350 mijë qytetarë që zgjodhën të qëndronin në shtëpi e të pranonin regjimin e Ramës.
“Bashkitë do të jenë 95 % një kolor. Kush është faji për këtë!? Është pikërisht faji i atyre 350 mijë vetave që ndenjën në shtëpi, 150 mijë të këtyre që nuk u dukën dhe 200 mijë tuajët bënë diferencën, ata që mungonin. Ju e keni fajin që nuk nxorët njerëzit në votim, për atë sa ju takon fajin tuaj. Ajo është ajo që solli këtë realitet këtu sot”, tha eksperti në ‘Top Talk’.
Sipas Sokos, opozita gjithashtu nuk e ka kryer detyrën ndaj qytetarëve, për t’i mbrojtur ata nga pushteti.
Opozita në gjykimin e ekspertit nuk ka të drejtë të ankohet, kur i dha garanci qytetarëve se do të votonin të lirë dhe të pa intimiduar nga bandat e qeverisë, por në QV-të nga jugu në veri ndodhi e kundërta.
“Opozita është që të mbrojë qytetarin nga pushteti. Nëse bodigardi vjen më thotë mua më rrahu ky, më fal kur ti nuk di të mbrosh veten si do të më mbrosh mua. Kjo është ai refuzimi që ka ndodhur. Refuzimi ka ardhur se opozita nuk ka qenë e aftë të marrë përsipër detyrimin që ka. Kush e mbron qytetarin sot nga arroganca e pushtetit!? Patjetër që opozita. Ne përsërisim të njëjtën retorikë çdo dy vite. Ishte detyrimi i opozitës që të mbronte qytetarët nga vjedhja e votës, sepse ajo që preket në fund fare është qytetari jo opozita. Ju kishit detyrën ta bënit, nuk e bëtë, dhe tani ankoheni”, tha Soko.
