Nga Boldnews.al
Kryetari i Komisionit të Zgjedhjeve, Ilirjan Celibashi, u detyrua t’i drejtohet për herë të dytë kutisë së votimit, mesditën e së dielës së 14 Majit 2023.
Ai shkoi i pari në qendrën e tij zgjedhore, në orën 7 të mëngjesit, për të votuar për kandidatin e tij të preferuar në një listë 6-emërore për Bashkinë e Tiranës.
Por, sistemi elektronik, ai që kishte ngritur vetë duke shpenzuar mbi 30 milionë euro, dështoi.
Teknikat e votimit dhe e identifikimit elektronik e la në baltë të parin Celibashin dhe në vijim, shumicën e votuesve shqiptarë për të paktën 3 orët e para të procesit elektoral.
Edhe në vijim, gjatë të gjithë ditës, Komisioni Qendror i Zgjedhjeve ishte në pamundësi absolute për të marrë të dhëna për numrin e votuesve në fasha orare të ndryshme nga thuajse gjysma e qendrave të votimit në Shqipëri.
Është një dështim i elektronikës apo është një tentativë për të dekurajuar votuesit që t’u drejtohen kutive të votimit? Kjo është e vështirë për t’u thënë në këtë moment, megjithëse si aspekti teknik, ashtu edhe ai politik, nuk janë për t’u përjashtuar.
Ilirjan Celibashi ka qenë ministër i kabinetit qeveritar të Edi Ramës dhe është zgjedhur disa herë në krye të KQZ-së nga Partia Socialiste.
Dekurajimi i votuesve shkon në dëm të opozitës, pasi një rregull i pashkruar, por i konfirmuar shpesh sugjeron se pjesëmarrja e madhe në votime është një goditje kundër qeverisë në pushtet.
Nga ana tjetër, mëse i dukshëm është fakti që teknika multi-miliona euro për infrastrukturën e votimit dhe identifikimit elektronik, ka dështuar.
Ilirjan Celibashi e mori përgjegjësinë për problematikat e sistemit. Gjithsesi, ai nuk e konsideroi problem fshirjen lehtësisht të bojës së përdorur për timbrimin e gishtave të qytetarëve, që kishin votuar.
Praktikisht, ana teknike e zgjedhjeve të 14 Majit 2023 është një dështim i plotë. Një dështim me vlera me shumë zero në euro.
“Boldnews.al” ka përmbledhur të gjithë tenderat e zhvilluar së fundmi nga Komisioni Qendror i Zgjedhjeve vetëm për aspektin teknik dhe teknologjik të procesit të votimit.
Tendera 25 mln euro
Në zgjedhjet e përgjithshme të vitit 2021, Komisioni Qendror i Zgjedhjeve përdori për herë të parë masivisht sistemin e identifikimit elektronik. Vlera e atij tenderi ishte rreth 20 milionë euro.
Ajo teknologji, më saktësisht aparaturat, u përdor edhe në zgjedhjet lokale të këtij 14 Maji, duke përditësuar të dhënat dhe softet përkatëse të pajisjeve elektronike.
Në vijim, KQZ ka zhvilluar në dy muaj e fundit edhe të paktën 6 procedura të tjera, që lidhen të gjitha me identifikimit dhe votimin elektronik.
– Procedura me negociim, pa shpallje paraprake, me objekt “Modulet për modernizmin e shërbimeve të KQZ” dhe me vlerë 72.000.000 lekë të reja.
– Procedura me negociim, pa shpallje paraprake, me objekt “Implementimi i projekt pilot të votimit dhe numërimit elektronik në zgjedhjet për organet e qeverisjes vendore të datës 14 Maj 2023”, me vlerë 6.326.957 lekë të reja.
– Procedura me negociim, pa shpallje paraprake, me objekt “Shërbimet e administrimin dhe menaxhimin e të dhënave të informacionit parazgjedhur dhe informacionin për rezultatet e zgjedhjeve për organet e qeverisjes vendore 2023”, me vlerë 17,460,000 lekë të reja.
– Procedura me negociim, pa shpallje paraprake, me objekt “Shërbime (logjistike dhe soft) për pajisjen e identifikimit elektronik”, me vlerë 316,832,179 lekë të reja.
– Procedura me negociim, pa shpallje paraprake, me objekt “Ngritja e sistemit për regjistrimin e procesit të numërimit të votave në VNVdhe transmetimit në kohë reale në KQZ, për zgjedhjet e vitit 2023”, me vlerë 126,745,300 lekë të reja.
– Procedura me negociim, pa shpallje paraprake, me objekt “Infrastruktura TIK e institucionit KQZ”, me vlerë 54,190,755 lekë të reja.
Kësaj liste i shtohet edhe procedura “Bojë timbruese për zgjedhësit”, me vlerë 15,990,000 lekë të reja.
