Kandidati i koalicionit “Bashkë Fitojmë” në Fier, Evdar Kodheli, ka bërë publik sot një tjetër formë abuzimi me votën nga ekipi i kandidatit të PS, kryebashkiaku aktual Armando Subashi: përdorimin e nxënësve për të orientuar votën. Kodheli theksoi se për parregullsitë e evidentuara janë bërë denoncimet përkatëse dhe situata do të monitorohet rregullisht në terren.
“Sot është një ditë kur vendos qytetaria, vendos qytetari për të ardhmen e këtyre 4 viteve për drejtimin e bashkisë së Fierit. Uroj dhe dëshiroj që deri në fund ky proces të jetë ashtu siç nisi, me qytetari, me kulturë dhe me një ndjenjë për ndryshim.
Që në mëngjes, nëpër qendrat e votimit, nxënës të shkollave minorenë, që orientonin (unë kam bërë edhe denoncimet përkatëse në media dhe në OSBE/ODIHR, me fakte, me video) ku minorenë orientonin sidomos moshat e treta për të votuar konkurrentin tim në garë me emër dhe me mbiemër. Ky është një akt i dënueshëm sepse ishte brenda perimetrit të ndaluar me ligj, kështu që shpresoj që në vazhdim procesi të jetë i qetë dhe pa incidente, pa shkelje të ligjit”.
