Blerja e votës në orët e fundit para procesit zgjedhor të ditës së nesërme, duket se është shtrirë gjeografikisht nga veriu në jug.
Teksa denoncime të forta vijnë nga Lefter Maliqi për blerje votash nga oligarku Pëllumb Salillari në Kuçovë dhe një 48-vjeçar është vënë në pranga teksa është kapur në flagrancë me listë zgjedhësish në Krujë, situata ka precipituar në dhunë në Mallakastër.
Mësohet se në qytetin naftëmbajtës është arrestuar në flagrancë, në tentativë për të blerë vota vëllai i kandidatit të PD-së së vulës, Agron Kapllanaj.
Burime pranë Drejtorisë së Policisë Fier bëjnë me dije se vëllai i kandidatit të Alibeajt për bashkinë e Mallakastrës është ndaluar mbrëmjen e sotme në zonën e Fratarit.
Mësohet se Shkëlqim Kapllanaj, që njihet si administratori i kompanisë “Shkëlqimi 007”, e cila ka përfituar miliona euro tendera nga bashkitë dhe qeveria Rama, dyshohet se ishte duke blerë vota.
Ai po ashtu ka goditur për shkak të detyrës administratorin e Njësisë Administrative Fratar, shtetasin me iniciale SH.K., ndërsa akuzohet dhe për veprën penale dëmtim prone.
Shoqërimi i vëllait të kandidatit të Alibeajt u bë në flagrancë nga forcat e policisë dhe materialet hetimore do t’i referohen Prokurorisë për hetime të mëtejshme.
