Më pak se 10 orë na ndajnë nga hapja e 5213 qendrave të votimit në mbarë vendin për të finalizuar procesin zgjedhor të 14 Majit, me verdiktin e shqiptarëve për 61 bashkitë, të shprehur përmes votës.
Teksa ethet e zgjedhjeve kanë mbërthyer vendin, kandidatët e Partisë Socialiste po shfrytëzojnë çdo presionin dhe shantazhet si benefite që ia lejon pushteti dhe çdo formë e makinacion tjetër për të tjetërsuar vullnetin e lirë të qytetarëve.
Nga veriu në jug, java e fundit e fushatës elektorale është shoqëruar me denoncime të shumta të kandidatëve të koalicionit opozitar “Bashkë Fitojmë” për blerje votash apo hedhje hi sysh përmes pakove të ushqimeve dhe asfaltit elektoral.
Rasti më flagrant ishte në Dibër, ku një punonjës i IKMT dhe dy kolege të tij, të gjithë pjesëtarë të stafit të zv/kryeministres Belinda Balluku, u kapën mat duket shpërndarë para për vota në një pallat në Peshkopi.
E teksa e gjithë administrata shtetërore është vendosur në funksion të makinerisë elektorale të Ramës, për blerjen e votave kanë nisur të japin kontribut edhe oligarkët që kryeministri ka pasuruar me miliona euro tendera, të lëvruar gjatë 10 viteve në pushtet.
Një prej oligarkëve më fort të investuar në këto zgjedhje është Pëllumb Salillari, i cili arriti të bindë së pari Blendi Cuçin (dyshohet se me një pagesë mijëra euro), e më pas Edi Ramën për të rikandiduar në bashkinë e Kuçovës, Kreshnik Hajdarin.
Salillari dhe Hajdari janë shndërruar në një binom të pandarë që gllabëron paratë e taksapaguesve të Kuçovës, me marrëdhënien simbiotike mes tyre që lulëzoi pasi kryebashkiaku firmosi tenderin 3 milionë euro për ndërtimin e një Ujësjellësi dhe shkatërrimin e burimit natyror të Sinecit.
E për t’i vendosur vulën bashkëpunimit, Pëllumb Salillari është kujdesur që të zhvendoset personalisht në Kuçovë javën e fundit, duke shpërndarë para në këmbim të votave që do të mbanin në pushtet “kukullën” e tij në Bashki, siç edhe është denoncuar nga kandidati i koalicionit “Bashkë Fitojmë”, Lefter Maliqi.
Pas një video ku shihej me “Maybach” luksoz duke qarkulluar rrugëve të qytetit pak ditë më parë, Salillari është kapur mat mbrëmjen e sotme në një lokal të Kuçovës duke bërë pazare në këmbim të votave.
Në një video të publikuar në Facebook nga Lefter Maliqi, oligarku i Ramës shihet në praninë e një grupi personash, që sipas denoncimit prej një muaji kanë zbrazur “qesen” me para në lagjet e qytetit dhe në fshatrat e Kuçovës, pa ju hyrë gjemb në këmbë nga policia, e cila është nën kontrollin e ministrit të Brendshëm Bledi Çuçi, njëherësh drejtues politik i qarkut të Beratit.
“Oligarku Pëllumb Salillari është zhvendosur në Kuçovë dhe sot në ditën e heshtjes zgjedhore ka dalë të blejë vota. Të tmerruar nga humbja e thellë që i pret nesër Çuçi ka angazhuar dhe patericën Salillari me shpresë se kështu do e ndryshoj rezultatin”, shkruan kandidati opozitar në Facebook.
Në vijim, Maliqi nënvizon se qytetarët e kanë vendosur që do të bëjën ndryshimin ditën e nesërme pavarësisht çdo tentative të Salillarit dhe Çuçit për të mbajtur pushtetin me vota të blera.
Ai gjithashtu nënvizon se “Bashkë Fitojjmë” ka mbledhur të gjtiha provat që vërtetojnë se oligarku ka tentuar të ndikojë procesin zgjedhor dhe materialet do të dorëzohen shumë shpejt në Prokurorinë e Posaçme (SPAK).
“I them Çuçit dhe Salillarit le ta zbrazin qesen siç kanë bërë këtë një muaj në Kuçovë dhe fshatrat përreth duke mbështetur një kufomë politike si Kreshnik Hajdari. Nesër do marrin përgjigjen e merituar nga qytetarët, nga Lumasi në Kozare, nga Perondia dhe qyteti i Kuçovës. Ku është SPAKU që duhet t’a procedonte dhe arrestonte këtë kriminel elektoral?!! Ne i kemi provat të gjitha të qendisura dhe do i paraqesim aty ku duhet nga e hëna e në vazhdim. Fitoren nuk mund t’a ndalë një njeri i përfshirë në afera korruptive dhe që i pi gjakun këtij populli bashkë me “Rilindjen”. Nesër Kuçova do i tregoj vendin ish-fatorinos së autobuzave Pëllumb Kreshnik Salillarit! Jemi të gjithë në këmbë! Të gjithë në patrullime!”, shprehet Maliqi.
