Situata në Dibër vijon e tensionuar. Pas akuzave për blerje votash në qytetin e Peshkopisë nga eksponentë të Partisë Socialiste, pak orë më vonë gjatë së premtes, ka ndodhur një tjetër ngjarje.
Sipas raportimeve mediatike, pas një debati verbal mes simpatizantëve të koalicionit opozitar dhe përfaqësuesve të PS-së në Maqellarë, gjatë largimit në shtëpi të të parëve për në fshatin Kllobcisht, nga makina me targë BX 495 CW, tipi Mercedes ML, ngjyra jeshile, është qëlluar me armë zjarri në ajër.
Më pas, makina është larguar me shpejtësi, por ka dalë nga rruga dhe ka përfunduar në një arë, por pa u dëmtuar personat në bord. Më pas, mjeti është larguar në drejtim të paditur dhe Policia ka qenë e pranishme në vendngjarje, por pa arrestuar autorët.
Personat brenda makinës kanë qenë të maskuar me kapuç. Kjo makinë raportohet se ka qarkulluar gjatë gjithë ditës në Maqellarë dhe fshatrat përreth.
Qytetarët e pranishëm në vendngjarje deklaruan dhe dyshuan se ishte ish-Administratori i njësisë administrative Maqellarë Erger Kosiqi, sot drejtor i Sigurimeve Shoqërore në Peshkopi.
