“Nuk jam regjistruar, nuk kam hyrë në garë, nuk kam dorëzuar as dokumentacionin në KQZ”.
Kështu shprehej për mediat pak ditë më parë Bujar Vreto, teksa si demokorat i flaktë i PD-së së Vulës, e la pa fjalë Enkelejd Alibeajn, duke i komunikuar se nuk mund të kandidonte për kryetar bashkie në Librazhd, për të mos i fryrë perçarjes.
Por, Vreto vijon të mbetet kryetari i degës së PD-së së Vulës në Librazhd, duke postuar në rrjetet e tij sociale edhe foto nga takimet ku u kërkon qytetarëve të votojnë listën me kandidatët e Alibeajt për këshillin bashkiak.
Jo vetëm kaq, por angazhimin e tij Vreto e ka shtrirë edhe më tej, duke “i dhënë një dorë” ndihmë për të mbledhur vota edhe kandidatit të Partisë Socialiste për bashkinë e Librazhdit në zgjedhjet e Majit, Mariglen Disha.
Të paktën këtë të lë të kuptosh një foto e shpërndarë në postimet e Dishës, teksa ai dhe Vreto hedhin valle së bashku në një prej takimeve elektorale.
Kryetari i grupit Alibeaj në Librazhd së bashku me kandidatin e Ramës për bashkinë kanë zgjedhur ta tregojnë bashkëpunimin me festë dhe këngë, duke treguar qartë pse bashkëpunimi Rama-Alibeaj është i suksesshëm edhe në politikën e dhe bizneset e Tiranës.
