Vrasësi portugez i Ardian Nikulajt ka kryer disa herë “prova” për mënyrën si do të shkonte në Shëngjin ditën që do të kryente ekzekutimin, e më pas për mënyrën si do të zhdukej për të humbur gjurmët.
Sipas provave të reja të zbardhura nga Top Channel, Ruben Saraiva një ditë para se të kryente porosinë për t’i marrë jetën Ardian Nikulajn me 6 plumba të pistoletës “TT” me të cilën shtiu në ambientet e lokalit “Coral”, kishte udhëtuar për të disatën herë nga Shkodra drejt Shëngjinit.
“Killeri” që mbetet ende në kërkim kishte adaptuar një taktikë, ku gjysmën e rrugës e bënte me automjetin tip “Golf 5” që kishte marrë me qira Edmond Haxhia në Shkodër dhe pjesën tjetër me motorin që përdori për t’u larguar nga skena e krimit.
Sakaq, pamje të reja që tregojnë lëvizjet e portugezit e që janë fiksuar nga kamerat e sigurisë së një karburantit, janë bërë gjithashtu publike.
Pamjet e sekuestruara së fundmi nga grupi i hetimit, tregojnë 28-vjecarin në karburant teksa furnizon mjetin, për të cilin pagoi njërin nga punonjësit, i cilësuar si dëshmitar nga ana e hetuesve, me 10 mijë lekë të vjetra, duke i thënë vetëm: “Ten lek”.
Për portugezin në kërkim drejtësia shqiptare i bën me dije autoriteteve në Britani se provat që e lidhin me Edmond Haxhinë janë të pakundërshtueshme.
Në shkresat që i janë dorëzuar atyre përmendet se përpos ADN-së, mjeti i marrë me qira nga porositësi Haxhia dhe i përdorur edhe nga vrasësi i bën të plota dyshimet kundër organizatorit dhe ekzekutorit në ngjarjen e Lezhës.
Sikundër edhe akti noterial për blerjen e motorrit, por edhe pritje-përcjelljet në aeroport të katër vëzhguesve, ku në pozitë më të vështirë ndodhet informatori Simpson (edhe ai në kërkim).
Pikërisht mbas sinjaleve që Simpson dha në vëzhgim e sipër, portugezi e realizoi krimin për të cilin kishin ardhur në Shqipëri edhe anglezë të tjerë me të njëjtin rol.
