Kreu i Partisë së Lirisë, Ilir Meta ka mbajtur homazhe në varrezat e Beratit për Ditën e Dëshmorëve, më 5 maj.
Në një deklaratë për media, Meta tha se shumë të rinj e të rreja u ekzekutuan në mënyrë mizore nga pushtuesi gjatë luftës anti fashiste, në përpjekje për të mbrojtur lirinë e vendit.
Sakaq u bëri thirrje gjithë shqiptarëve që të votojnë më 14 maj në të lirë, pasi liria e tyre nuk do cenohet nga askush dhe se atdheu në të cilin jetojnë meriton të jetë i lirë.
“5 maji, dita e dëshmorëve e djemve dhe vajzave më të mira të vendit që sakrifikuan jetën për lirinë e Shqipërisë. Ishte detyrimi imi që të vijë në Berat, qyteti që çdo shtëpi në Mangalem, Goricë u kthye në një kala të vogël të luftës antifashiste. Berati e pagoi shumë shtrenjtë, këtë sakrificë me gjakun e të rinjve. Margarita dhe Kristaqi, u ekzekutuan në mënyrën më mizore nga pushtuesi, pikërisht për të vrarë ëndrrën e të rinjve për lirinë e atdheut.
U ekzekutuan dy të rinj intelektual, nga një familje patriotike për shpalljen e pavarësisë, në formimin e shtetit vetëm se nuk pajtoheshin me pushtuesit. Gjaku i tyre veçse frymëzoi mijëra të rinj, në betejën për liri dhe për të çliruar vendin. Do ta ruajmë si të shtrenjtë kujtimin, atdheu na duhet që të jetojmë të lirë. Do bëjmë gjithçka për të begatuar atdheun tonë, për të forcuar pavarësinë dhe lirinë tonë. Duhet të shkojmë të votojmë të lirë, liria e shqiptarëve nuk do cenohet nga askush, do mbrohet vetë nga patriotët. I përhershëm kujtimi i heronjve të Beratit dhe gjithë Shqipërisë”, tha ai.
