Kandidati i koalicionit ‘Bashkë Fitojm’ për Memaliajn, Albert Malaj ka akuzuar ditën e sotme kandidatin e PS për bashkinë e Telelenës, Pëllumb Milorin për blerje votash dhe manipulim të qytetarëve duke përdorur postin e tij në administratën publike.
Me anë të një postimi në Facebook, Malaj shprehet se Pëllumb Milori gjatë dhe pas orarit zyrtar të punës, po angazhohet në favor të fushatës zgjedhore të kandidatit socialist në Memaliaj duke u premtuar hipotekim të pallateve banorëve në fshatin Canaj, Njësia Administrative Luftinjë pak dite para zgjedhjeve.
Më tej ai shprehet se e njëjta situatë rezulton të jetë edhe në fshatin Iliras Njësia Administrative Qesarat në pallatet dykatëshe, duke e dënuar këtë akt si shkelje të kodit zgjedhor.
“Pushteti vazhdon përmes metodave diabolike, të deformojë vullnetin e votuesve në Bashkinë Memaliaj. Po konstatoj me shqetësim të madh, veprimtarinë tërësisht të papranueshme dhe të dënueshme të drejtorit të Hipotekës së Tepelenës Pëllumb Milori. Ky i fundit gjatë dhe pas orarit zyrtar të punës, po angazhohet totalisht në favor të fushatës zgjedhore të kandidatit humbës në Memaliaj duke u premtuar hipotekim të pallateve banorëve në fshatin Canaj, Njësia Administrative Luftinjë pak dite para zgjedhjeve. Këto ditë janë kryer matjet dhe pagesat nga banorët. E njëjta situatë rezulton të jetë edhe në fshatin Iliras Njësia Administrative Qesarat në pallatet dykatëshe. I dashur Pëllumb! Me gjithë respektin që kam për ty si person, të sygjeroj të mos bëhesh vegël e partisë pasi je në kundërshtim me ligjin. Ke patur gjithë kohën e mjaftueshme për t’i hipotekuar pallatet pasi ke disa vite në krye të institucionit. Po të them se je në shkelje të ligjit. Uroj që mos të jetë premtim elektoral për banorët që të marrin hipotekat të cilat kanë 4 dekada që po presin.”, shkruan Malaj.
