Financuesit dhe organizatorët në Angli të ekzekutimit mafioz të Ardian Nikulajt përzgjodhën si ekzekutor portugezin Ruben Saraiva. Prej më shumë se 10 vitesh ai jetonte në Angli. Përzgjedhja jo e rastësishme. Kjo nga e shkuara e tij kriminale dhe përvoja në mbajtjen dhe përdorimin e armëve në kryeqytetin anglez.
TCH duke iu referuar prokurorisë angleze CPC ka siguruar skedën e tij penale nga e cila kuptohet se përzgjedhja për krimin në Shqipëri kishte një arsye te fortë. Skeda e tij personale tregon se Ruben Saraiva gjatë 10 viteve të fundit është përfshirë në krime që lidhen me mbajtjen e armëve të zjarrit pa leje.
Dënimi i tij i parë nga një gjykatë angleze lidhet për armëmbajtje pa leje. Pas daljes nga burgu për këtë vepër penale ai akuzohet dhe dënohet për dëmtime trupore të rënda ndaj një personi. E shkuara kriminale e killerit të Shëngjit, ardhur nga Anglia nuk mbaron me kaq. Sërish në vitin 2017 ai është dënuar për armëmbajtje pa leje.
Ndërkohë, dënimi i tij i fundit në Angli lidhet me posedim kokaine për qëllime shitje.
Sipas policisë shqiptare Ruben Saraiva mbërriti në Lezhë në muajin shkurt duke qëndruar në fshatin Karriq. Top Channel të hënën tregoi këtë video ku në një lokal në Shkodër shfaqet Ruben Saraiva.
Pas vrasjes në 19 Prill, ai u largua në drejtim të Greqisë. Pikërisht me policinë helene po bashkëpunojnë autoritetet për të kapur portugezin, i cili besohet se nuk ka dalë nga territori i fqinjit tonë jugor./TCH
