Sezoni i dytë i Marash Kumbullës te Roma ka qenë me oshilacione, me trajnerin Mourinho që pak e ka preferuar.
Ndeshjen e fundit si titullar Kumbulla e ka më 12 mars ndaj Sassuolos, por një karton i kuq në atë ndeshje, bëri që të mos i besoheshin më minuta, përveç asaj ndaj Fejnord, ku u aktivizua në të dytën.
Roma do të përballet këtë fundjavë me Milanin në kampionat dhe objektivi i të dyja skuadrave është një vend në Champions League. Problemet në mbrojtje janë kthyer në një shqetësim për stafin teknik.
Në ndeshjen e fundit ndaj Atalantës verdhekuqtë humbën edhe shërbimet e Lorentes. Mbrojtësi është dëmtuar dhe tashmë opsioni i fundit që Mourinho-s i mbetet është vetëm aktivizimi i Marsh Kumbullës si titullar.
Mediat në Itali e shohin ndeshjen ndaj Milanit si shansin e fundit për mbrojtësin e Kombëtares shqiptare, për të bindur Mourinhon për vlerat e tij. Roma është edhe në gjysmëfinale të Europa League, ndaj një paraqitje e mirë këtë fundjavë, do të ishte bonus edhe në përballjet me Leverkusen për Kumbullën.
