Grupi hetimor pas verifikimeve ka dalë në përfundim se makina tip “Land Rover” nuk është përdorur në vrasjen e biznesmenit lezhjan, Ardian Nikulaj, më 19 prill në lokalin në pronësi të tij në plazhin e Shëngjinit.
Burimet bëjnë me dije se mjeti i përket dy shtetasve zviceranë, të cilët pas marrjes në pyetje kanë thënë se kishin ardhur në vendin tonë për pushime duke treguar edhe itinerarin e tyre.
Çifti i bashkëshortëve nga Zvicra sqaruan hetuesit se kanë marrë një shtëpi me qira në fshatin Kukël dhe nuk kanë pasur dijeni për vrasjen.
Kështu janë rrëzuar dyshimet se mjeti u përdor nga autori i vrasjes, pasi braktis motorin. Hetimet për atentatin ndaj kandidatit për këshillin bashkiak të Lezhës janë përqendruar në verifikimin e shtetasit anglez, i cili pasi ndodhi ekzekutimi u nis nga Shëngjini drejt aeroportit të Rinasit dhe u kthye në Angli.
Organet e drejtësisë kanë bërë gati një letër porosi me disa pyetje për t’ia dërguar homologëve në Britani. Burimet theksojnë pyetjet që do ti drejtohen shtetasit anglez kanë të bëjnë me qëllimin e vizitës së tij në Shëngjin, takimet që ka kryer, lëvizjet para dhe pas ngjarjes. Ai do të pyetet dhe për personat që e kanë shoqëruar gjatë qëndrimit në Shqipëri.
