Nga Boldnews.al
Kandidati i koalicionit opozitar “Bashkë Fitojmë” për Hasin, Myftar Dauti, i cili ka denoncuar publikisht kundërshtarin e tij për blerje votash, është proceduar nga policia.
Këtë të Mërkurë, drejtoria e Kukësit njoftoi zyrtarisht nisjen e procedimit penal ndaj Dautit për veprat penale “Kanosja” dhe “Kundërshtimi i punonjësit që kryen një detyrë shtetërore ose një shërbim publik”.
Kallëzimi nga vajza e kryebashkiakut
Sipas bluve, kallëzim ndaj tij ka bërë përgjegjësja pranë Zyrës së OSSH-së, dega Has se është kanosur një ditë më parë nga kandidati i opozitës. Gjithashtu, shton se një tjetër kallëzim është bërë nga një elektricist i OSHEE-së, i cili pretendon se në Helshan, gjatë procesit të punës për dërgimin e një transformatori të energjisë elektrike në këtë fshat, është kundërshtuar nga Dauti dhe dy persona që e shoqëronin. Në këto kushte, policia thotë se i ka proceduar të tre.
“Specialistët për Hetimin e Krimeve të Komisariatit të Policisë Has referuan materialet në Prokurori dhe nisi procedimi në gjendje të lirë për shtetasin M.D., 56 vjeç, banues në fshatin Golaj, pasi më datë 18.04.2023, ka kallëzuar shtetasja E. M., 28 vjeçe, me detyrë Përgjegjëse pranë Zyrës së OSSH-së, dega Has, se është kanosur nga shtetasi M.D.”, thuhet në njoftimin e bluve.
“Gjithashtu, specialistët për Hetimin e Krimeve të Komisariatit të Policisë Has referuan materialet në Prokurori dhe nisi procedimi në gjendje të lirë për shtetasit M. D., 56 vjeç, S. D., 43 vjeç dhe F. D., 52 vjeç, të tre banues në fshatin Golaj, pasi më datë 19.04.2023, ka kallëzuar shtetasi I. A., me detyrë elektriçist pranë OSHEE-së, Krumë, se në fshatin Helshan, gjatë procesit të tij të punës, për dërgimin e një transformatori të energjisë elektrike, në këtë fshat, është kundërshtuar për kryerjen e këtij procesi pune, nga shtetasit M. D., S. D. dhe F. D.”, vijon më tej njoftimi.
Dauti: Institucionet shtetërore po përdoren për fushatë
Boldnews.al kontaktoi me kandidatin e koalicionit Bashkë Fitojmë, i cili mohoi se të ketë fyer personin në fjalë apo të ketë kanosur përgjegjësen e OSSH-së.
Ai tha se drejtuesja e OSSH-së është vajza e kryebashkiakut socialist, Halit Muja, ndërsa akuzoi se posti i saj po shfrytëzohet nga i ati për blerje votash, duke kryer punime në periudhë fushate elektorale.
Dauti shtoi se mjetin e ndaloi ashtu siç veproi me rastin e mëparshëm pas dyshimeve për përdorimin e institucioneve publike nga pushteti lokal për blerje votash.
“Dy ditë më parë unë i ndalova makinën me ushqime, që djali i kryebashkiakut kishte marrë në magazinë dhe do ti shpërndante për fushatë. Ndërkohë sot, kishin tjetër plan. Po shfrytëzojnë për fushatë çdo gjë. Unë e ndalova dhe së bashku me shoqëruesit e mi e pyetëm shoferin se për ku ishte drejtuar. Ky i fundit nuk donte të jepte shpjegime, por u nis direkt në polici. Unë nuk e kam problem se ata kallëzojnë. Nuk do lejojmë që për vota, kryebashkiaku që mban dy emra të shfrytëzojë institucionet dhe shpërndajë ushqime apo të kryej punime që ia pengon ligji”, tha ai.
Në media u publikua një moment konflikti mes Dautit dhe vajzës së kryebashkiakut socialist, ku kandidati i opozitës denoncon kryerjen e punimeve, sipas tij, për qëllime elektorale.
Pakot me ndihma
Mbrëmjen e së Hënës, kandidati i opozitës zbuloi në një emision televiziv se kishin ndaluar furgonin e djalit të kandidatit të PS, Halit Muja. Mjeti, sipas Dautit, kishte ndihma që do të shpërndaheshin për banorët si një formë e blerjes së votës për zgjedhjet lokale të 14 Majit.
Vetë kryebashkiaku i Hasit pranoi se ndihmat do të shpërndaheshin me rastin e Natës së Kadrit.
Në një njoftim për ngjarjen, policia tha se në mjet u ushtrua kontroll dhe u konstatuan 21 pako me mbishkrimin “Rezerva Materiale Shtetërore” që ishin ngarkuar në magazinën e bashkisë.
Policia po ashtu konfirmoi e një hetimi dhe marrjen në pyetje të magazinerit të bashkisë dhe dy djemve të kryebashkiakut. Ky i fundit pranoi për mediat se një nga djemtë e tij po i transportonte ndihmat ushqimore pas një kërkese për ndihmë nga magazinieri i bashkisë së Hasit.
Pavarësisht denoncimit për blerje votash, policia në këtë rast nuk ngriti asnjë akuzë penale për çështjen.
