Dy fermerë kanabisi shqiptarë, të cilët u arrestuan në Raby Road të Hartlepool gjatë një mësymje të policisë britanike në një “shtëpi bari” me vlerë 486.000 paund janë dënuar me burg nga Gjykata e Teesside të martën.
Mediat lokale në Liverpul raportojnë se Vladimir Cela dhe Kreshnik Sulvovari, të konsideruar edhe si “punëtorët besnikë” të mafias shqiptare kishin një rol të rëndësishëm prodhimin e kanabisit, ndaj u dënuan respektivisht me 41 muaj dhe 39 muaj burg.
Aksioni për kapjen e Vladimir Cela (41 vjeç) dhe Kreshnik Sulvovari (35 vjeç) ishte tepër dinamik për policinë britanike pasi dy shqiptarët tentuan arratisjen me një furgon “Peugeot” me ngjyrë të bardhë, që e kishin përdorur për aktivitetin e tyre kriminal.
Ndërkohë në fabrikën e kanabisit u zbuluan mbi 550 bimë. Rendimenti i bimëve që u gjetën brenda vlerësohet të jetë midis 16 kg dhe 48.5 kg dhe fitimi mund të arrinte midis 162,000 dhe 486,000 £ nëse droga do të shitej në rrugë.
Cela dhe Sulvovari, të dy pa vendbanim fiks, u paraqitën në Gjykatën e Kurorës Teesside të martën, përmes videolink-ut nga burgu i Durham, duke u njohur me dënimin përkatës. Dyshja ishin deklaruar më parë fajtorë për prodhimin e një droge të klasit B në një ambient komercial.
Prokurori Daniel Ingham deklaroi se oficerët e policisë kryen një kontroll në tre prona në Raby Road, Hartlepool, më 23 janar. Dy prej pronave kishin muret e tyre të brendshme të shembura në mënyrë që të krijohej lidhja midis tyre.
Prokurori tregoi se kur oficerët e policisë ishin në ambientet e Hartlepool, një furgon i bardhë Peugeot u shfaq jashtë dhe “u largua me shpejtësi”. Cela u identifikua si drejtuesi i mjetit dhe Sulvovari si pasagjeri, ndërsa aksionin e pasoi një ndjekje e shkurtër e tyre deri në momentin e arrestimit.
Cela u gjet se kishte fatura nga një dyqan ku mund të bliheshin pajisje për një fermë kanabisi.
