Një tjetër pistë hetimi po ndiqet nga Policia, lidhur me shpërthimin me tritol në banesën e Muhamed Dukës, që sipas informacioneve të para, dyshohej se lidhej me përplasjet që kishte djali i këtij të fundit me të shumkërkuarin Ervis Martinaj.
Por përveç pistës së një paralajmërimi, policia , dyshon se ngjarja mund të jetë edhe e stisur, nisur kjo nga arrestimi i Leonard Dukës në Belgjikë pak javë më parë dhe si një përpjekje për të mos u ekstraduar mund të jetë përdorur kjo taktikë.
Mësohet se prej katër vitesh Muhamed Duka nuk jetonte me bashkëshorten në banesë. Për t’u kujdesur kishte lënë një tjetër njeri, të cilin policia akoma nuk e ka gjetur për ta marrë në pyetje. Në pyetje nuk është marrë as Muhamed Duka pasi nuk dihet se ku është. Janë pyetur vetëm banorë të pallatit dhe fqinjë, por asnjë nuk ka dhënë dëshmi të vlefshme pasi kanë deklaruar se kanë qenë në gjumë dhe kanë dëgjuar vetëm shpërthimin e fuqishëm.
