Policia në qarkun e Fierit ka zbuluar në harkun e 24 orëve, rreth 700 fidanë kanabis në dy aksione policore, në fshatrat Kreshpan dhe Ngjeqar.
Pas arrestimit të një 49-vjeçareje, në banesën e së cilës u gjetën 182 fidanë kanabisi të mbjellë në kubikë, një tjetër aksion në Ngjeqar të Roskocvecit, ka çuar në zbulimin e një sere me rreth 500 bimë kanabisi, gati për t’u kultivuar në tokë.
Policia ka arrestuar në flagrancë 46-vjeçarin Shaban Refitaj si autorin e dyshuar të këtij rasti kultivimi, si dhe ka asgjësuar fidanët e kanabisit.
Njoftimi i policisë:
Shërbimet e Komisariatit të Policisë Fier, në zbatim të detyrave të marra në kuadër të planit operacional mbarëkombëtar, për intensifikimin e kontrolleve në terren dhe në ambiente të mbyllura, me qëllim parandalimin e kultivimit të bimëve narkotike dhe goditjen e kësaj veprimtarie kriminale që në fazë fillestare, me mbështetjen e inteligjencës informative, kanë goditur në kuadër të operacionit policor “Ngjeqar”, një rast tjetër të tentativës për kultivim të bimëve narkotike.
Gjatë kontrollit në fshatin Ngjeqar, në afërsi të liqenit të këtij fshati, shërbimet e Policisë zbuluan një serë të përshtatur për kultivimin në vazo, të rreth 500 fidanëve të dyshuar narkotikë kanabisi, të cilët u asgjësuan nga këto shërbime. Gjithashtu në kuadër të operacionit “Ngjeqar”, si autor i dyshuar i këtij rasti, u arrestua në flagrancë shtetasi Sh. R., 46 vjeç, banues në Ngjeqar, Roskovec.
Materialet procedurale i kaluan Prokurorisë pranë Gjykatës së Rrethit Gjyqësor Fier, për veprime të mëtejshme.
