Shpërthimi me tritol i makinës së kreut të PD-së në Vaun e Dejës, Benard Ndreca, ishte një tronditje për politikën në prag të fushatës elektorale për zgjedhjet lokale të 14 Majit.
Ngjarja e rëndë u regjistrua rreth orës 07:10 të mëngjesit, në oborrin e banesës së Ndrecës, në fshatin Paçam.
Shpërthimi ka ndodhur në momentin që Benard Ndreca ka hipur në mjetin e tij tip ‘Audi’, por fatmirësisht ai nuk është lënduar dhe në vendngjarje ka vetëm dëme materiale.
Sipas policisë, lënda plasëse ishte vendosur në pjesën e përparme të makinës, ndërsa dyshohet se shpërthimi është kryer me telekomandë.
Një provë e vlefshme që pritet të ndihmojë hetuesit në zbardhjen e ngjarjes janë kamerat e shumta të sigurisë në banesën e kreut të PD, nga të cilat deri më tani mësohet se janë fiksuar lëvizjet e dy personave në orare të ndryshme.
Policia po bën këqyrjen e plotë të pamjeve, ndërkohë që nuk përjashtohet fakti se atentati mund të jetë një mesazh që lidhet me detyrën e Ndrecës si kreu i PD-së lokale, në prag të zgjedhjeve vendore.
Ndërkohë vetë Ndreca, pasi i shpëtoi atentatit, jashtë kamerave është shprehur për gazetarët lokalë që ndodheshin pranë banesës së tij se nuk ka konflikte me askënd dhe nuk dyshon tek askush.
Të vetmet dyshime deri në këto momente janë ato të lidhura me fushatën elektorale, me shpërthimin që ndodhi 12 orë pasi të gjithë kandidatët për Këshillin Bashkiak të Vaut të Dejës nga grupi “Alibeaj”, deklaruan tërheqjen nga gara.
Sakaq, në banesën e Ndrecës përveç forcave të shumta të policisë dhe prokurorit që po kryejnë veprime hetimore, ka mbërritur me shpejtësi edhe kandidati i koalicionit opozitar “Bashkë Fitojmë” për bashkinë e Vaut të Dejës, Zef Hila.
Prej më shumë se një ore pranë Ndrecës ndodhet edhe kryetar i PD-së së Alibeajt në Vaun e Dejës, Gentian Ndoj dhe deputetja e Qarkut Shkodër, Greta Bardeli.
Ndoj dhe Bardeli nuk kanë nxituar të japin deklarata për mediat, por ish-deputeti demokrat Hila teksa qëndronte pranë gardhit rrethues të banesës së Ndrecës pati një komunikim tepër të shkurtër jozyrtar me gazetarët.
“Atë e ka dasht Zoti. Ka ndez makinën e ka shku me vesh këpucët. Ai vetë nuk është dëmtu, kjo ka rëndësi, pa të tjerat…”, është shprehur Hila.
I pyetur nëse shpërthimi ka qenë i telekomanduar, Hila është përgjigur: “S’e di. Nuk e di ça me thënë”.
LEXO EDHE:
E rëndë/ Hidhet në erë me tritol makina e kreut të PD-së në Vaun e Dejës (FOTO)
Dalin PAMJET/ Shpërthim ka qenë i fuqishëm, shikoni si u shkatërrua makina e Ndrecës
Atentati/ Tritoli shpërtheu kur kreu i PD hipi në “Audi”, policia zbardh detaje
