Komisioni Evropian do të padisë Poloninë, Hungarinë dhe Republikën Çeke në Gjykatën Evropiane të Drejtësisë për refuzimin e marrjes së azilkërkuesve.
Komisioni, organi ekzekutiv i BE, akuzoi tre vendet për “mosrespektimin e detyrimeve të tyre ligjore “.
Gjykata me qendër në Luksemburg mund të shqiptojë gjoba të rënda.
Në vitin 2015, BE përcaktoi një plan për shpërndarjen e kuotave të emigrantëve dhe refugjatëve, pas fluksit të lartë të tyre.
Ky veprim ishte një përpjekje për të lehtësuar presionin mbi Greqinë dhe Italinë, ku mbërritën shumica dërrmuese e emigrantëve.
Megjithatë, Republika Çeke ka pranuar vetëm 12 nga 2000 azil-kërkuesit, të cilët u ishte caktuar, ndërsa Hungaria dhe Polonia nuk kanë marrë asnjë.
Komisioni filloi proçedurat e shkeljes kundër tre shteteve në qershor dhe i paralajmëroi ata muajin e kaluar se mund të ndërmerreshin veprime të mëtejshme.
Komisioni ka vendosur të shkojë në fazën tjetër të proçedurës së shkeljes dhe t’i referojë tre shtetet anëtare në gjykatën e drejtësisë të BE.
Pas njoftimit të së enjtes, Kryeministri çek Andrej Babis i tha BBC se vendi i tij do të vazhdojë të kundërshtojë skemën e zhvendosjes.
Ai tha se sistemi i kuotave kishte ushqyer ndjenjën anti-migrante dhe kishte luajtur në duart e të djathtës ekstreme.
Zëvendësministri i Jashtëm i Polonisë, Konrad Szymanski, gjithashtu tha se qeveria e tij ishte “gati për të mbrojtur qëndrimin e saj në gjykatë”.
Në vitin 2015 shtetet e BE ranë dakord të shpërndajnë 160,000 azilkërkues mes tyre, bazuar në madhësinë dhe pasurinë e secilit vend, megjithëse, Rumania, Republika Çeke, Sllovakia dhe Hungaria votuan kundër pranimit të kuotave të detyrueshme.
Komisioni gjithashtu po merr Hungarinë në GJED për ligjet e saj mbi arsimin e lartë dhe OJQ-të.
Qeveria e krahut të djathtë po kërkon të miratojë një ligj të arsimit të lartë që mund të mbyllë Universitetin e Evropës Qendrore, i themeluar nga financuesi dhe filantropisti Xhorxh Soros.
Soros ka një marrëdhënie të tensionuar me kryeministrin hungarez Viktor Orban.
Komisioni tha se ligji arsimor i Hungarisë “kufizon në mënyrë disproporcionale universitetet e BE dhe jo në BE në operacionet e tyre dhe duhet të rishikohet në përputhje me ligjin e BE”.
