Tërheqja nga futbolli e Mesut Özil pak kohë më parë trishtoi shumë fansa të yllit gjermano-turk anembanë globit, por ish-mesfushori i Real Madrid e Arsenalit duket se ka gjetur rrugën e tij jashtë fushës së blertë.
Në fakt profesioni i ri nuk ka lidhje aspak me topin e futbollit, pasi emri i Ozil figuron në listën e kandidatëve për deputet që partia e Presidenti Rexhep Taip Erdogan ka dorëzuar në komisionin e zgjedhjeve.
Sipas welt.de dhe portalit turk të lajmeve “Haber7”, emri i ish-lojtarit ndërkombëtar, tanimë 34 vjeç do të jetë në listat e AKP-së për zgjedhjet e 14 majit.
Ndërkohë, Presidenti Erdogan kohët e fundit kishte njoftuar se “emra befasues” do të shfaqeshin në listën e kandidatëve, duke përfshirë një emër nga sporti.
Nuk është befasi që Özil kandidon për partinë e Erdoganit. Ish-futbollisti e ka pranuar hapur miqësinë e tij me Presidentin prej vitesh dhe në vitin 2019 Erdogan ishte edhe i ftuari i nderit në dasmën e Özil.
Para Kupës së Botës 2018, Özil bëri bujë duke postuar në internet një foto me kreun autoritar të shtetit. Mesfushori, asokohe ndërkombëtar gjerman, nuk u distancua nga Erdogani, por nuk donte që fotoja të kuptohej si mesazh me përmbajtje politike.
Gjatë debateve, Özil më vonë u tërhoq nga kombëtarja e “Panzerave”.
I lindur në qytetin Gelsenkirchen në Gjermaninë perëndimore, Özil ka komentuar rregullisht për çështje politike në të kaluarën. Vetëm dy ditë më parë ai u bëri thirrje ndjekësve të tij në Twitter që të solidarizohen me palestinezët.
Ish-mesfushori ka postuar një foto, ku mbi një top ka shkruar ‘Liri për Palestinën’, në një mesazh drejtuar kundër shtetit të Izraelit.
