Dinamo nuk ia ka dalë të rrëmbejë përsëri kreun në Kategorinë e Parë pasi nuk siguroi dot më shumë se një pikë në ndeshjen ndaj Turbinës në transfertë.
Pas barazimit mes Flamurtarit dhe Skënderbeut, blutë mund të merrnin kreun dhe njëkohësisht të siguronin një distancë sigurie nga vlonjatët duke ecur më të qetë drejt Superiores në javët e mbetura. Por sot ata janë shtangur në stadiumin “Nexhip Trungu” në Cërrik teksa e kanë parë veten në disavantazh për shumë minuta pas golit të Metanit.
Allmuça në pjesën e dytë ktheu barazinë në shifra por pavarësisht tentativave nga të dy ekipet deri në fundin e ndeshjes, nuk kishte gola të tjerë dhe kështu sfida u mbyll me shifrat 1-1, që lënë kryeqytetasit në vendin e dytë, 1 pikë larg Skënderbeut kryesues dhe 2 para Flamurtarit që i ndjek.
Vlonjatëve po u afrohet rrezikshëm edhe Korabi, i cili është kthyer në vendin e katërt me fitoren 1-0 ndaj Orikut.
