Dy persona të armatosur kanë kryer një grabitje në banesën e shtetasit Agron Nezha, në fshatin Kosovë e Vogël në Lushnjë.
Ngjarja ka ndodhur rreth orës 20.30 të ditës së shtunë, kur në banesën që shihni në fotografi ka qenë brenda vetëm një grua e moshuar. Sipas informacioneve shuma e grabitur ka qenë 5 milionë lekë të vjetra dhe bizhuteri floriri.
Njëri nga grabitësit ka hyrë direkt në dhomën e gjumit në katin e dytë dhe me thikë në dorë ka hapur sirtarin e komodinës ku mbaheshin paratë dhe arturinat.
E moshuara, Zeqine Nezha, ka parë hajdutin të veshur me kostum jeshil, me kapuç në kokë dhe dorashka të kuqe dhe ka thirrur emrin e djalit të saj.
Më pas hajduti është larguar së bashku me shumën e parave. Siç shikohet nga kamerat e sigurisë së banesës, ai ka ulur kokën duke zbritur shkallet, ndërsa një tjetër person me armë në dorë e priste jashtë.
Pas ngjarjes ka ardhur policia e Lushnjes e cila është vënë në kërkim të autorëve. Kjo është hera e tretë që vidhet e njëjta banesë në këtë fshat dhe asnjë nga autorët nuk është gjetur.
