12 shoqëri rajonale të ujësjellës – kanalizimeve janë licencuar nga Enti Rregullator i Ujit në veprimatrinë e furnizimit me ujë dhe largimin e ujërave të ndotur, duke i hapur rrugën operimit të ndërmarrjeve ekzistuese si një e vetme.
Vendimet janë marrë pas reformës së ndërmarrë për bashkimin e 58 kompanive ekzistuese, në 15 shoqëri me kompetenca të përbashkëta. Ndërkohë që, në bazë të tyre janë specifikuar edhe aksionet që do të zotërojë secila bashki, duke qenë se tashmë 51% e tyre disponohen nga Ministria e Infrastrukturës dhe Energjisë, ndërsa pjesa tjetër ndahet mes bashkive. 3 shoqëritë rajonale, që nuk janë licencuar ende janë Tirana, Shkodra dhe Vlora, që në total përfshijnë 11 bashki.
Bashkimi i kompanive nënkupton edhe një unifikim të tarifave të ujit që paguajnë qytetarët, çka do të sjellë rritje për shumë qytete. Për këtë arsye, në rezolutën për vitin 2023 Kuvendi i kërkoi Entit Rregullator të Ujit të kryejë një analizë lidhur me strategjinë dhe mundësinë e tarifave që duhet të propozojnë për miratim 15 shoqëritë e reja të ujësjellës-kanalizimeve, teksa duhet të shoqërohet me konkluzione dhe rekomandime sesi duhet të kryehet ky proces.
Paralelisht, në kuadër të reformës rrënjësore në sektorin e ujit, ERRU duhet të ketë në fokus kryesor reduktimin e stafit të tepërt të shoqërive UK rajonale, kur këto të fundit do të aplikojnë për tarifa të reja pranë saj, si dhe të monitorojë dhe rekomandojë nivelin e pagave dhe shpërblimeve që ndikojnë në shpenzime.
/Tv Scan/
